ރޭގެ މާލޭގައި ބޭއްވުނު ސުލްހަވެރި އިހުތިޖާޖު ފުލުހުން ރޫޅާލައި، އިސްކޮށް ހަރަކާތްތެރިވި ޒުވާނުން ހައްޔަރުކުރުމާ ގުޅިގެން ހިތަދޫ މެދު ދާއިރާގެ ޕީއެންސީ މެމްބަރު އަހުމަދު އަޒާން ކަންބޮޑުވުން ފާޅުކުރައްވައިފިއެވެ.
ފާއިތުވި ދުވަސްތަކުގައި ޒުވާނުން ސިލްސިލާ ގޮތެއްގައި ކުރަމުންދިޔަ މުޒާހަރާ ބާރުގެ ބޭނުންކޮށްގެން ފުލުހުން ރޫޅާލާފައިވާ ކަމަށާއި، މުޒާހަރާގައި އިސްކޮށް ހަރަކާތްތެރިވި މަޙްޒޫމް މާޖިދް (28އ) އަދި ޢާއިޝަތު ޝިމަން އަޙްމަދު (19އ) ފުލުހުން ހައްޔަރުކޮށްފައިވެއެވެ.
"ފާއިތުވި ވެރިކަމުގައިވެސް ސުލްހަވެރި އިހުތިޖާޖުތައް ހުއްޓުވަން ފުލުހުން ހާލަތާއި ނުބައްދަލު ބާރު ބޭނުންކުރަމުން ގެންދިޔައެވެ. މިއަދުގެ ސަރުކާރުން ވެރިކަމަށް އައީ އެކަން ބަދަލުކުރާނެ ކަމަށް ވައުދުވަމުންނެވެ. އެހެނަސް މިފެންނަނީ ފުލުހުން ނިކުމެ ހަރުކަށިކަމާއި އެކު ސުލްހަވެރި އިހުތިޖާޖުތަކަށް ހުރަސް އަޅަމުން ގެންދާތަން. މިއީ ކަންބޮޑުވާ ކަމެއް" އަޒާން އެކްސްގައި ކުރެއްވި ޕޯސްޓެއްގައި ވިދާޅުވިއެވެ.
ސުލްހަވެރިކަމާއެކު އިޙުތިޖާޖު ކުރުމަކީ ޤާނޫނު އަސާސީން ކަށަވަރުކޮށްދޭ އަސާސީ ޙައްޤެއް ކަމަށާއި ރޭގެ މުޒާހަރާއިން ހައްޔަރުކުރި ޒުވާނުން ދޫކޮށްލުމަށް އަޒާން ގޮވާލެއްވިއެވެ.
ފުލުހުން ބުނެފައިވަނީ މަޙްޒޫމް ހައްޔަރުކޮށްފައިވަނީ ފުލުހުންގެ ވާޖިބު އަދާކުރުމަށް ހުރަސްއަޅައި އަމުރަށް ނުކިޔަމަންތެރިވެ ފުލުހަކަށް ހަމަލާދޭން މަސައްކަތް ކުރި ކަމުގެ ތުހުމަތުގައިކަމަށެވެ. އަދި ޝިމަން ހައްޔަރުކޮށްފައިވަނީ ފުލުހުންގެ އަމުރަށް ނުކިޔަމަންތެރިވެ ވާޖިބަށް ހުރަސްއެޅި ކަމުގެ ތުހުމަތުގައި ކަމަށްވެސް ފުލުހުން ބުނެފައިވެއެވެ.
އެހެންނަމަވެސް، ފުލުހުން މުޒާހަރާ ރޫޅާލީ ދަރިވަރުންގެ ތަޢުލީމީ މަސްލަހަތަށާއި އާންމު ރައްޔިތުންގެ ދިރިއުޅުމަށް ކުރާ އަސަރުތަކަށް ރިއާޔަތްކޮށްގެން ކަމަށް އެފަރާތުން ހާމަކޮށްފައިވެއެވެ.
ޒުވާނުން މިހާރު ކުރަމުންދާ މުޒާހަރާތަކަކީ މިދިޔަ މަހުގެ 18 ވަނަ ދުވަހު އުސް އިމާރާތަކުން ވެއްޓި ނިޔާވި ހައްވާ ޔުމްނު ރަޝީދު (21އ) އަށް އިންސާފު ހޯދައިދިނުމަށް ގޮވާލާ ކުރަމުންދާ މުޒާހަރާތަކެއް ކަމަށް ދެކެވެއެވެ.
ކޮމެންޓު ފޮނުވާ