މަސައްކަތްތެރިންގެ އަޑު އެހުމުގައާއި، އެފަރާތްތަކަށް ދިމާވާ ގޮންޖެހުންތައް ޙައްލުކޮށް އާމްދަނީ އިތުރުކުރެވޭނެ މަގުތައް ތަނަވަސްކޮށްދިނުމުގައި ސަރުކާރުން ކޮންމެ ދުވަހަކުވެސް ދެމިއޮންނާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
މޭ މަހުގެ 1 ވަނަ ދުވަހަކީ ބައިނަލްއަޤުވާމީ މަސައްކަތްތެރިންގެ ދުވަސްކަމުގައި ދުނިޔޭގެ އެކި ކަންކޮޅުތަކުގައި ފާހަގަކުރިއަސް، ރައީސް މުޢިއްޒު ގަބޫލުކުރައްވާ ގޮތުގައި ކޮންމެ ދުވަހަކީވެސް މަސައްކަތްތެރިންގެ ދުވަހެކެވެ. އެމަނިކުފާނު ވިދާޅުވިގޮތުގައި ދިވެހި ޤައުމު ކުރިއަރާގޮސް އަންނަނީ މަސައްކަތްތެރިންގެ އަގުހުރި ޚިދުމަތުގެ ސަބަބުންނެވެ.
"ދިވެހިރާއްޖެ މިއަދު މި ހިސާބަށް ގެނުވައިދިނީ މަސައްކަތްތެރިންނެވެ. އަދި މާދަމާ ޤައުމު ވާޞިލުވާން ބޭނުންވާ އުސްމިންތަކަށް ދަތުރުކުރާނީވެސް މަސައްކަތްތެރިންގެ އެހީގައެވެ. އެއްވެސް ޝައްކެއްނެތި، ދިވެހި އުއްމަތުގެ ޙަޤީޤީ ހަކަތައަކީ މި ޤައުމުގެ ހީވާގި ޚިދުމަތްތެރިންނެވެ" މިފަދައިން ރައީސް ވިދާޅުވިއެވެ.
ރާއްޖޭގައި އިޤްތިޞާދީ މަސައްކަތްތައް އިތުރުކޮށް، ވަޒީފާގެ ފުރުޞަތުތައް ގިނަކުރުމަށް ސަރުކާރުން ޚާއްޞަ މަސައްކަތްތަކެއް ކުރަމުންދާކަން ރައީސް ފާހަގަކުރެއްވިއެވެ. އެގޮތުން، ވަޒީފާއަދާކުރާ ފަރާތްތަކަށް ލިބޭ އުޖޫރަ އިތުރުކުރުމަށާއި، އެކި ދާއިރާތަކުގެ ޚިދުމަތްތެރިން ދަފުތަރުކޮށް، ގެދޮރުގެ ހިޔާވަހިކަމުގެ ސްކީމްތަކާއި ބޭންކް ލޯނު ލިބުންފަދަ ކަންކަން ފަސޭހައިން ޙާޞިލުކުރެވޭނެ މަގުތައް ތަނަވަސްކޮށްދިނުމަށް ސަރުކާރުން ފަށާފައިވާ މަސައްކަތްތަކަށް ބޮޑު ކާމިޔާބެއް ލިބިގެންދާނެކަމަށް އެމަނިކުފާނު ޔަޤީންކަން ފާޅުކުރެއްވިއެވެ.
"ޤައުމަށް ފައިދާހުރި މަސައްކަތްތެރި އަތްތައް ގިނަކުރުމަށްޓަކައި، މަސައްކަތުގެ އަޚްލާޤާއި ހުނަރު ތަޢުލީމީ މަންހަޖުގައި އިތުރުކުރަން ޖެހޭ" ކަމަށް ރައީސް ވިދާޅުވިއެވެ. އަދި "ވަޒީފާއަދާކުރާ ބިދޭސީން ރަނގަޅަށް ބެލެހެއްޓުމާއި، ގާނޫނު ތަންފީޛުކުރުމަށް ސަރުކާރުން ފަށާފައިވާ މަސައްކަތްތައް ހުއްޓުމެއްނެތި ކުރިއަށް ގެންދިއުމަކީ" މުހިންމުކަމެއްކަން އެމަނިކުފާނު ފާހަގަކުރެއްވިއެވެ.
ރައީސް މުޢިއްޒުގެ ހިތާބުގައި ދިވެހި ކޮންމެ ބެލެނިވެރިއަކަށް ޚާއްޞަ އިލްތިމާސެއް ކުރެއްވިއެވެ. އެއީ ކޮންމެ ދަރިވަރަކީވެސް މަސައްކަތަށް އަހުލުވެރި، ހީވާގި ކުދިންގެ ގޮތުގައި ބޮޑުކުރުމަށް ޚާއްޞަ ސަމާލުކަން ދިނުމެވެ. އަދި އެއްވެސް ދިވެއްސަކު މަސައްކަތެއް ނުކޮށް ބާކީވެގެން ނުދިއުމަށްޓަކައި، މުޅި މުޖުތަމަޢު ގުޅިގެން ގައުމީ މަސައްކަތްތަކެއް ފެށުމުގެ މުހިންމުކަން ރައީސް ފާހަގަކުރެއްވިއެވެ. ދިވެހިން އެދޭ ތަމައްދުން ޙާޞިލުކުރެވޭނީ އެފަދަ ގުޅިގެން ކުރާ މަސައްކަތުގެ ތެރެއިން ކަމުގައި ރައީސް މުޢިއްޒު ވިދާޅުވިއެވެ.
ކޮމެންޓު ފޮނުވާ