2020 ނިމިގެން މި ދިޔައީ ހަނދާނުން ފިލުވާލަން ދަތި ގިނަކަންތައްތަކެއް އަޅުގަނޑުމެން އެންމެނަށް ގެނެސްދީފައެވެ. ގާތްގަނޑަކަށް ބިރުވެރި "ރޯލާކޯސްޓަރ ރައިޑެއް" ފަދަ ގޮތަކަށޭވެސް ބުނެވިދާނެވެ. މިފަހަރު މި ބަލާލަނީ މުޅި އަހަރު ދުވަހު ބޮލީވުޑްގައި ނުވަތަ އިންޑިއާގެ ފިލްމު އިންޑަސްޓްރީގައި ހިނގާދިޔަ ފާހަގަކޮށްލެވޭކަންކަމަށެވެ.
ބޮލީވުޑް ޑްރަގް ހަބެއްގެ ގޮތުގައި ބްރޭންޑްވުން
އަހަރުގެ މެދެއްހާތާ އެކްޓަރ ސުޝާންތު ސިންގ ރާޖްޕުތުގެ މަރާއެކު ފެންމަތިވީ މައްސަލަތަކާއެކު ދާއިރާގެ ބައެއް ތަރިންގެ ފަރާތުންނާއި ލީކުވީ ޗެޓްލޮގް ތަކެއްގެ ތެރެއިން ޑްރަގްގެ ގިނަ މައްސަލަތަކެއް ފެންމަތިވެ، އާންމުންނާއި މީޑިއާއިން ބޮލީވުޑަށް ޑްރަގް މާފިއާއެއްގެ ނަމުން މުހާތަބުކުރާ ވަރަށް ކަންކަން ބޮޑުވިއެވެ. މި މައްސަލަތަކުގެ ތެރޭ އަލަށް އަރަމުން އައި ގިނަ ތަރިންތަކަކަށް ތުހުމަތުގެ އިނގިލި ދިއްކުރެވުނު ބޮލީވުޑްގެ އޭ ގްރޭޑްގެ ބައެއް ތަރިންނާވެސް ވަނީ މައްސަލައިގެ ތަހުގީގަށް ސުވާލުކޮށްފައެވެ.
ބޮއިކޮޓް ކެމްޕޭނާއި ނެޕޮޓިޒަމްގެ ބަހުސް
މިއީ ވެސް ސުޝާންތުގެ މަރާއެކު އާންމުވި ކަންތައްތަކެވެ. ސަޕޯޓަރުންނާއި ލޯބިވާ މީހުންގެ ބާރު، ބޮލީވުޑްގައި ވަކި ހިއްޕާލައިގެން ތިބި ބޮޑެތި ބޮޑެތި ޑައިރެކްޓަރުންނަށާއި ޕްރޮޑިއުސަރުންނަށް ދައްކާލި ކަމެކެވެ. ސުޝާންތު ފަދަ ފިލްމީ އާއިލާއަކަށް ނިސްބަތް ނުވާ ދާއިރާއަށް އަލަށް ނުކުންނަން ބޭނުންވާ މީހުނަށް އޮތް ދަތިތަކާއި ގޮންޖެހުމުގެ ވާހަކައިން ފެށި މިބަހުސް ނިމުނީ ބައެއް ޕްރޮޑިއުސަރުންގެ ފިލްމުތައް ބޮއިކޮޓްކުރުމާއި އެކަމަށް ގޮވާލާ ކެމްޕެއިން ތަކުންނެވެ. މިގޮތުން ނަން ކަނޑައަޅައި ބޮލީވުޑްގެ މަޝްހޫރު ބޮޑެތި ތަރިންނާއި ޕްރޮޑިއުސަރުންނާއި ޑައިރެކްޓަރުންނަށް ނެޕޮޓިޒަމްގެ ލޭބަލް އާންމުންނާއި މީޑިއާތަކުން ވަނީ ދީފައެވެ. އަދި އޭގެ އަސަރު ބައެއް ފިލްމުތަކަށް ވަރަށް ބޮޑަށް ކޮށްފައިވެސް ވެއެވެ.
އޯޓީޓީއަށް ދާން މަޖުބޫރުވެ، ގިނަ ޕްރޮޑިއުސަރުން އެގޮތް ބޭނުންނުވި
ކޯވިޑް-19ގެ ސަބަބަނުން ފިލްމުތަކުގެ މަސައްކަތް ހުއްޓާލަން ޖެހުމުގެ އިތުރަށް ސިނަމާތަށް ބަންދުކުރަން ޖެހުމުން އެއްކޮށް މަސައްކަތް ނިންމާ އަޅުވަން ދުވަސްކަނޑައަޅާފައިވާ ފިލްމުތައްވެސް ނާޅުވާ ލަސްކޮށްލަން ޖެހުނެވެ. މިކަމުގެ ހައްލަކަށް އޮތީ ކޮންމެވެސް އޮންލައިން ޕްލެޓްފޯމެއްގައި ފިލްމުތައް ޕްރިމިއަރ ކުރުމެވެ. އަދި އޯޓީޓީއެއްގައި ފިލްމު ރިލީސްކޮށްފިނަމަ މާގިނަ ބަޔަކަށް ފިލްމުތައް ގެބެލޭނެކަމަށް އިންޑަސްޓްރީގެ ގިނަ ބަޔަކު ގަބޫލުކުރިއެވެ. އެގޮތުން އޯޓީޓީގެ އެހީގައި އެއްފަހަރާ 200 އެއްހާ ގައުމުގައި ފިލްމުތައް ރިލީސްކުރެވޭނެ ކަމަށް އޭރު ބައެއް ތަރިން ބުނަމުން ދިޔައެވެ. ނަމަވެސް ދުނިޔޭގައި އަދި މިހާތަނަސް އޮންނަނީވެސް 195 ގައުމެވެ.
ތަރިން މިހެން ބުނަމުން ދިޔަ ނަމަވެސް އޯޓީޓީގައި ރިލީސްކުރި ގިނަ ފިލްމުތަކަށް އެދެވޭ ކާމިޔާބެއް ވަނީ ނުލިބިފައެވެ. އަދި ގިނަ ޕްރޮޑިއުސަރުންވެސް ބުނީ އެމީހުން ފިލްމު ތައްޔާރުކުރަނީ ބޮޑުސްކްރީނުގައި އެންމެ އެކީ ތިބެގެން ފިލްމު ބަލަން ޓާގެޓްކޮށްގެން ކަމަށާއި ފޯނެއް ނޫނީ ކޮމްޕިއުޓަރެއްގެ ކުޑަ ސްކްރީނަކުން އެފިލްމުތަށް ދައްކަން އެމީހުން ބޭނުން ނުވާކަމަށެވެ.
ބޮލީވުޑް އެއްކޮށް ކަހަލަ ގޮތަކަށް ރާއްޖެއަށް
ކޮރޯނާގެ ބިރުވެރިކަމާއެކު ދުނިޔޭގެ ހުރިހާ ގައުމުތަކެއް ދަތުރުފަތުރު ހުއްޓާލުމާއި ލޮކްޑައުން އިއުލާން ކުރުމުން ގިނަ ފިލްމު ސްޓޫޑިއޯތައް ވަގުތީގޮތުން ބަންދުކޮށް ތަރިން އާއިލާއާއެކު ލޮކްޑައުންއަށް ދިޔައެވެ. އިންޑިއާގެ ހާއްސަކޮށް މުމްބާއީގެ ލޮކްޑައުންއަށް ލުއި ލިބުނު އިރު ރާއްޖޭގެ ބޯޑަރުވެސް ވަނީ ހުޅުވާލާފައެވެ. އަދި ރާއްޖެ އިޝްތިހާރު ކުރުމަށް ކުރެވުނު ކެމްޕޭންތަކާއެކު އިންޑިއާގެ ގިނަ ތަރިންތަކެއް އެމީހުންގެ ގޭބަންދުން ވީއްލި ހިތްހަމަ ޖައްސާލުމަށް ހިޔާރުކުރީ ދިވެހި ރާއްޖޭގެ ދޮންވެލި ގޮނޑުދޮށްތަކެވެ.
އިންޑިއާގެ ބައެއް މީޑިއާތަކުން ރާއްޖެއަކީ އައު މުމްބާއީގެ ގޮތުގައި ސިފަކުރާ ވަރަށް ރާއްޖެއަށް އިންޑިއާގެ ތަރިން ވަނީ މިދިޔަ އަހަރުގެ ފަހުކޮޅު އައިސްފައެވެ. މިކަމާ ނުރުހުން ފާޅުކުރި އާނމުން ދަންނަ އިންޑިއާގެ ބައެއް މޫނުތައްވެސް ފެނިގެންދިޔައެވެ.
