މިހާތަނަށް 1 މިލިއަނަށްވުރެ ގިނަ މީހުންނަށް ވެކްސިން ދީގެން، ދުނިޔޭގައި މިހާތަނަށް އާބާދީގެ ނިސްބަތުން ވެކްސިން ދިނުމުގައި އެންމެ ކުރީގައި އުޅޭ ގައުމަކީ އިސްރާއީލު ކަމުގައި، އޮކްސްފޯޑް ޔުނިވާރސިޓީން ބަލަހައްޓާ، ދުނިޔޭގައި ވެކްސިންދޭ ރޭޓް ޓްރެކްކުރަމުންދާ ވެބްސައިޓުން ދައްކައިފިއެވެ.
މިވެބްސައިޓުން ދައްކާ ގޮތުގައި، މިހާތަނަށް އައިއިރު، އިސްރާއީލުންވަނީ، އެގައުމުގެ އާބާދީގެ ކޮންމެ 100 މީހަކުން 12 މީހަކަށް ކޯވިޑް19 ވެކްސިންގެ ފުރަތަމަ ޑޯޒް ދީފައެވެ.
އިސްރާއީލަށްފަހު، ދެން އެންމެ ކުރީގައި އުޅެނީ ބަހުރެއިނެވެ. އެގައުމުގައި ވަނީ، އާބާދީގެ ކޮންމެ 100 މީހަކުން 3.5 މީހަކަށް މިހާރު ވެކްސިން ދީފައެވެ. ދެން އެންމެ ގިނަ އަދަދަކަށް ވެކްސިން ދީފައިވާ ގައުމަކީ އިގިރޭސިވިލާތެވެ. އިގިރޭސިވިލާތުގައި މިހާތަނަށް އައިއިރު، އާބާދީގެ ކޮންމެ 100 މީހަކުން 1.5 މީހަކަށް ވަނީ ވެކްސިން ދީފައެވެ.
ކޯވިޑް19 އަށް ޕޮޒިޓިވް ވެގެން، މިހާތަނަށް އައިއިރު، މުޅި ދުނިޔޭގައި 1.8 މިލިއަން މީހުންވަނީ ދުނިޔެ ދޫކޮށްފައެވެ. އެންމެ ގިނަ އަދަދެއްގެ ބަޔަކު މަރުވެފައިވަނީ އެމެރިކާގައެވެ.
ދުނިޔޭގައި ވެކްސިން ދެމުންދާ އަދަދުތައް ބަލަހައްޓަމުން ދަނީ، "އަވަރ ވޯލްޑް އިން ޑާޓާ"އިންނެވެ. މިއީ އިގިރޭސިވިލާތުގެ އޮކްސްފޯޑް ޔުނިވަރސިޓީއާއި އެގައުމުގެ ހިލޭސާބަހަށް މަސައްކަތްކުރާ ތައުލީމު ފޯރުކޮށްދޭ ޖަމްއިއްޔާއަކާ ގުޅިގެން ގާއިމްކޮށްފައިވާ އިންތިޒާމެކެވެ.
މިކުންފުނިން މިހާރު ގެންދަނީ، ދުނިޔޭގެ އެކި ކަންކޮޅުތަކުގައި، ކޯވިޑް19 ވެކްސިންގެ ފުރަތަމަ ޑޯޒް ދެމުންދާ މިންވަރު ބަލަހައްޓަމުންނެވެ. ދުނިޔޭގައި މިހާރުދެމުންދާ ކޯވިޑް19 ވެކްސިންތަކަކީ، ވެކްސިންގެ 2 ޑޯޒު ކޮންމެ މީހަކުވެސް ޖަހަންޖެހޭ ވެކްސިންތަކެކެވެ. ދެވަނަ ޑޯޒެއް ޖަހަން ޖެހެނީ ފުރަތަމަ ޑޯޒްދޭތާ މަދުވެގެން 1 ހަފްތާ ފަހުންނެވެ.
ވެކްސިން ދޭން ފެށުމުގެ ކުރިން، 2020 ވަނަ އަހަރު ނިމުމުގެ ކުރިން، އެގައުމުގެ އާބާދީގެ 20 މިލިއަން މީހުންނަށް ވެކްސިން ދޭން ކަޑައެޅި ލަޑުދަޑި ހާސިލް ނުކުރެވި، އަހަރު ނިމިގެން ދިޔައިރު އެމެރިކާއަށް ދެވިފައިވަނީ ކޯވިޑް19 ވެކްސިންގެ 2.78 މިލިއަން ޑޯޒެވެ.
ހަމަ އެއާއެކު، އިންޑިއާއިން މިހާރު ގެންދަނީ، އެގައުމުގެ އާބާދީއަށް ވެކްސިން ދޭން ފެށުމުގެ ކުރިން ބާއްވާ އެންމެ ފަހުގެ ޑްރިލްތައް ބާއްވަމުންނެވެ. ބެލެވޭ ގޮތުގައި، އެގައުމުގައި ބޭނުން ކުރާނެ ކޯވިޑް19 ވެކްސިނަށް އަންނަ ހަފްތާފައި އިންޑިއާގެ ކަމާގުޅޭ މުވައްސަސާތަކުން ހުއްދަ ދޫކުރާނެއެވެ.
ދުނިޔޭގައި މިވަގުތު އެންމެ އަވަސް ސްޕީޑެއްގައި ވެކްސިންދޭ ގައުމަށް އިސްރާއީލު ވެގެން ގޮސްފައިވާއިރު، އެގައުމުން ކޯވިޑް19 ވެކްސިން ދޭން ފަށާފައިވަނީ ފާއިތުވެދިޔަ އަހަރުގެ ޑިސެމްބަރ މަހުގެ 19 ވަނަ ދުވަހުއެވެ. އަދި އެގައުމުން ދަނީ ދުވާލަކަށް 150،000 މީހުންނަށް ވެކްސިން ދެމުންނެވެ. އިސްރާއީލުގައި ވެކްސިން ދިނުމުގައި އިސްކަން ދެމުންދަނީ އުމުރުން 60 އަހަރުން މަތީގެ މީހުންނަށާ، ސިއްޙީ އެހީތެރިންނަށާ އަދި ބޮޑެތި ބަލިތަކަށް ބޭސް ކުރަމުންދާ މީހުންނަށެވެ.
ކޯވިޑް ކާރިސާ ދުނިޔޭގައި ފެތުރެން ފެށުމާއެކު ކަހަލަ ގޮތަކަށް އިސްރާއީލުން ވަނީ، ފައިޒާ-ބައޯއެންޓެކް އާއި މަޝްވަރާކޮށް، އެގައުމަށް ބޭނުންވާ ވެކްސިން ލިބޭނެ އިންތިޒާމްތައް ހަމަޖައްސާފައެވެ. އަދި އެގައުމުގެ ސިއްޙީ ނިޒާމުގައި ގާއިމް ކޮށްފައިވާ ސިސްޓަމްގެ ތެރެއިން ދަނީ، ވެކްސިން ކޮންމެހެން ޖަހަންޖެހޭ މީހުންނާ ގުޅާ، ވެކްސިން ޖެހުމުގެ އިންތިޒާމްތައް ހަމަޖައްސަމުންނެވެ. އިސްރާއީލުގައި، ސަރުކާރު ގަބޫލުކުރާ ސިއްޙީ ފަރުވާދޭ ކޮންމެވެސް ތަނެއްގައި އެގައުމުގެ ކޮންމެ ރައްޔިތަކުވެސް ރަޖިސްޓްރީވެފައި އޮތުމަކީ ގާނޫނީގޮތުން ކުރުން ލާޒިމް ކުރާ ކަމެކެވެ.
