ށ. މާއުނގޫދޫ ހެލްތު ސެންޓަރަށް އާ އިމާރާތެއް އިތުރުކުރުމުގެ އަމަލީ މަސައްކަތް ފެށުމަށް ތައްޔާރުވެފައިވާކަމަށް އެމްޓީސީސީން މިއަދު ހާމަކޮށްފިއެވެ. 1280 މީހުންގެ އާބާދީއެއް ދިރިއުޅޭ މާއުނގޫދޫގައި ހެލްތު ސެންޓަރު ތަރައްޤީވެގެން ދިއުމާއެކު، ރަށުގެ ރައްޔިތުންނަށް މިހާރަށްވުރެ ފުރިހަމަ ސިއްޙީ ޚިދުމަތްތަކެއް ލިބި، ގިނަގުނަ ފައިދާތަކެއް ކުރާނެކަމަށް އެމްޓީސީސީން ފާހަގަކޮށްފައިވެއެވެ.
އެމްޓީސީސީން އިތުރަށް ހާމަކުރިގޮތުގައި، ރާއްޖޭގެ އެކި ސަރަހައްދުތަކުގެ ރަށްރަށުގައި ރައްޔިތުންނަށް ކޮންމެހެން ބޭނުންވާ ޒަރޫރީ ކަންކަމާ ގުޅުންހުރި ގިނަ މަޝްރޫޢުތައް ނުފެށި ހުއްޓިފައިވާ ހިނދު، މިކަމަށް ހައްލެއް ހޯދުމުގެ ގޮތުން ރައީސް މުޢިއްޒުގެ އިރުޝާދުފުޅުގެ ދަށުން މި މަސައްކަތްތައް އެމްޓީސީސީއާ ހަވާލުކޮށްފައިވެއެވެ.
މިއާއެކު، މިއަދު ވަނީ ރ. އުނގޫފާރު ރީޖަނަލް ހޮސްޕިޓަލާއި ތިނަދޫ ޑރ. ޢަބްދުއްސަމަދު މެމޯރިއަލް ހޮސްޕިޓަލް ޓާޝަރީ ފެންވަރަށް ތަރައްޤީކުރުމުގެ މަސައްކަތްވެސް އެމްޓީސީސީއާ ހަވާލުކޮށްފައެވެ. އަދި ށ. މިލަންދޫގައި ދެ ބުރީގެ ހޮސްޕިޓަލަކާއި، އިސްލާމީ މަރުކަޒެއްގެ އިތުރުން ރަށުގައި މިހާރު ހަދާފައިވާ އައުޓްޑޯ ޖިމްގެ އިކުއިޕްމަންޓް ބަދަލުކުރުމުގެ މަޝްރޫޢުގެ އަމަލީ މަސައްކަތްވެސް ފެށުމަށް ތައްޔާރުވެފައިވާކަމަށް އެމްޓީސީސީން ބުނެފައިވެއެވެ.
އުމްރާނީ ތަރައްޤީގެ މަޝްރޫޢުތަކުގެ އަދާހަމަ މަޢުލޫމާތު ހިއްސާކުރުމަށާއި މަޝްވަރާކުރުމަށް ދާދި ފަހުން ރައީސް އޮފީހުގައި ކެބިނެޓުގެ ބައްދަލުވުމެއް ބޭއްވިފައިވެއެވެ. މި ބައްދަލުވުމުގައި މިނިސްޓަރުންގެ އިތުރުން ސަރުކާރު ހިއްސާވާ ކުންފުނިތަކާ ހަވާލުކޮށްފައިވާ މަޝްރޫޢުތަކުގެ އެންމެ ފަހުގެ މަޢުލޫމާތު ހިއްސާކުރެވުނެވެ. އެގޮތުން އެސްޓީއޯ، ވެމްކޯ، ފެނަކަ، އާރްޑީސީ، އެމްޓީސީސީ އަދި އެމްޑަބްލިއުއެސްސީން ކުރިއަށްގެންދާ މަޝްރޫޢުތަކުގެ މަޢުލޫމާތު ހިއްސާކޮށްފައިވާކަމަށް ރައީސް އޮފީހުން ބުނެފައިވެއެވެ.
ރައީސް އޮފީހުން އިތުރަށް ފާހަގަކުރިގޮތުގައި، ރައީސް މުޢިއްޒުގެ އަމާޒަކީ ސަރުކާރުން ހިންގާ މަޝްރޫޢުތަކުގެ އެންމެ ފަހުގެ މަޢުލޫމާތު ވީހާވެސް ގިނައިން ރައްޔިތުންނަށް ފޯރުކޮށްދީ، ދެފުށް ފެންނަ ގޮތެއްގައި މަސައްކަތްތައް ހަލުވިކޮށް ކުރިއަށް ގެންދިއުމެވެ.
ކޮމެންޓު ފޮނުވާ