ހެންވޭރުގައި ހުރި ގެއެއްގެ ފުރާޅުން މިދިޔަ ހުކުރު ދުވަހު ވެއްޓުނު 21 އަހަރުގެ އަންހެން ޒުވާނާގެ މައްސަލައިގައި ސަރުކާރުން ޒުވާނުންގެ އަޑު އަހަންޖެހޭ ކަމަށް ހިތަދޫ މެދު ދާއިރާގެ މެމްބަރު އަހުމަދު އަޒާން ވިދާޅުވެއްޖެއެވެ.
މި ޒުވާން އަންހެން ކުއްޖާ ފުރާޅަކުން ވެއްޓިފައި އޮއްވާ ފެނުނީ މިދިޔަ ހުކުރު ދުވަހުގެ ހެނދުނުގައެވެ. އޭނާ ވެންޓިލޭޓަރުގައި ބޭއްވުމަށްފަހު މިހާރު ވެންޓިލޭޓަރުން ނަގާފައިވީ ނަމަވެސް، އޭނާގެ ހާލަތު އަދިވެސް ވަނީ ސީރިއަސްކޮށެވެ.
މި މައްސަލައާ ގުޅިގެން ފުލުހުން މިދިޔަ އަންގާރަ ދުވަހުގެ ރޭ ބޭއްވި ކުއްލި ނޫސްވެރިންގެ ބައްދަލުވުމުގައި ހާދިސާ ހިނގާދިޔަ ގޮތުގެ ސީސީޓީވީ ފުޓޭޖުތަކެއް ދައްކާފައިވެއެވެ. އެ ބައްދަލުވުމުގައި އަނިޔާ ލިބުނު އަންހެން ކުއްޖާގެ ވަނަވަރު ހާމަކުރި ނަމަވެސް، މި ހާދިސާއާ ގުޅުންހުރި އެހެން އެއްވެސް ފަރާތެއްގެ ނަމެއް ހާމަކޮށްފައެއް ނުވެއެވެ. މީގެއިތުރުން، މި ހާދިސާ ހިނގި ރޭ އެ އަންހެން ކުއްޖާއާއެކު ހުރި 21 އަހަރުގެ ޒުވާނަކު މަސްތުވާތަކެއްޗަށް ޕޮޒިޓިވްވި ނަމަވެސް، މިހާތަނަށް އޭނާ ހައްޔަރުކޮށްފައިނުވާކަން ފާހަގަކުރެވެއެވެ.
މި މައްސަލައިގައި ފުލުހުން ތަޙުޤީޤު ކުރިއަށްގެންދާ ގޮތާމެދު އާންމުންގެ ފަރާތުން ބޮޑެތި ފާޑުކިޔުންތައް އަމާޒުވެފައިވެއެވެ. އެގޮތުން، އިންސާފަށް ގޮވާލައި ރޭގަނޑު މާލޭގައި ގިނަ އަދަދެއްގެ ޒުވާނުން އިހުތިޖާޖެއް ބާއްވާފައިވެއެވެ.
އެކްސްގައި ކުރެއްވި ޕޯސްޓެއްގައި އަޒާން ވިދާޅުވެފައިވަނީ ޒުވާނުންގެ އަޑު ސަރުކާރުން އަޑުއަހަންޖެހޭ ކަމަށާއި، ފުލުހުން މިހާތަނަށް އާންމުކޮށްފައިވާ މަޢުލޫމާތުތަކުގައި ސުވާލު އުފެދޭ ގިނަ ކަންތައްތަކެއް ހުރި ކަމަށެވެ. އަދި މިފަދަ މައްސަލަތަކުގައި ކުރިން ޢަމަލުކުރަމުން އައި ގޮތާ ތަފާތު ގޮތަކަށް ޢަމަލުކުރާނަމަ، އެ ތަފާތު ގެންނަ ސަބަބު ސާފުކޮށްދޭންޖެހޭ ކަމަށްވެސް އަޒާން ވިދާޅުވިއެވެ.
"އަނިޔާ ލިބުނު ޒުވާނާއަށް އިންސާފު ލިބޭނެކަން ކަށަވަރުކުރަންޖެހޭ" ކަމަށް އަޒާން ވިދާޅުވެފައިވެއެވެ.
ކޮމެންޓު ފޮނުވާ