އިނގުރައިދޫގައި ބުޅާ ގިނަވެ، ރައްޔިތުންނަށް އުނދަގޫވަމުންދާތީ، އެރަށުގައި އުޅޭ ބުޅާތައް ރަށުން ބޭރުކުރުމަށް އިނގުރައިދޫ ކައުންސިލުން ނިންމައިފިއެވެ.
މިކަމާ ގުޅިގެން އިނގުރައިދޫ ކައުންސިލުން ވަނީ، އެރަށުގައި އުޅޭ ބުޅާތައް ރައްކާތެރިގޮތުގައި ހިފައި، އެއްވެސް ރަށެއްގެ އިހްތިސާސްގެ ތެރޭގައި ނުހިމެނޭ ފަޅުރަށަކަށް ގެންގޮސްދޭނެ ފަރާތެއް ހޯދުމަށް ދިވެހި ސަރުކާރުގެ ގެޒެޓްގައި އިޢުލާންކޮށްފައެވެ.
ކައުންސިލުން މަޢުލޫމާތު ދެއްވާގޮތުގައި، މިހާރަކަށް އައިސް އެރަށުގައި އާންމުންނަށް އުނދަގޫވާވަރަށް ބުޅާ ގިނަވެފައިވާތީ، ރައްޔިތުންގެ އެދުމުގެ މަތިން މިކަން ކުރުމަށް ނިންމީއެވެ.
"މި މަސައްކަތް ކުރަންވާނީ ބުޅަލަށް އެންމެ ރައްކާތެރި ގޮތަށް" ކަމަށް ކައުންސިލުން ބުނެފައިވެއެވެ. މި މަސައްކަތަށް ޝައުގުވެރިވާ ފަރާތްތަކުން މިހިނގާ އޭޕްރިލްމަހުގެ 27 ވާ އާދިއްތަ ދުވަހުގެ ކުރިން އިނގުރައިދޫ ކައުންސިލް އިދާރާއަށް ކޯޓޭޝަން ހުށަހެޅުމަށް އެދިފައިވެއެވެ. އަގު ހުށަހަޅަންޖެހޭނީ 300 ބުޅާ ހިފައިދޭ އަގަށްކަމަށްވެސް ކައުންސިލުން ފާހަގަކޮށްފައިވެއެވެ.
ފާހަގަކޮށްލެވޭ ކަމަކީ، އާންމުންނަށް އުނދަގޫވާވަރަށް ބުޅާ ގިނަވުމުގެ މައްސަލައަކީ މިހާރު ވަރަށް ގިނަ ރަށްރަށުގެ ރައްޔިތުންގެ ޝަކުވާއަކަށް ވެފައިވާ ކަމެކެވެ. މީގެތެރޭގައި މާލޭ ސަރަހައްދުވެސް ހިމެނޭއިރު، މާލޭގައި ބުޅަލަށް ޚާއްޞަ ތަނެއްވެސް ވަނީ ޤާއިމްކޮށްފައެވެ.
ކޮމެންޓު ފޮނުވާ