ރ. މާކުރަތުގައި ހައިޑްރޮޕޮނިކްސް ތަމްރީން ޕްރޮގްރާމެއް ބާއްވަނީ

ރ. މާކުރަތުގައި ފެނުގައި ގަސް ހެއްދުމުގެ (ހައިޑްރޮޕޮނިކްސް) ތަމްރީން ޕްރޮގްރާމެއް ކުރިއަށް ގެންދިއުމަށް ރަށު ކައުންސިލުން ނިންމައިފިއެވެ. މި ޕްރޮގްރާމަކީ ރަށު ކައުންސިލާއި މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއަރއާ ގުޅިގެން ކުރިއަށް ގެންދާ ޕްރޮގްރާމެކެވެ.

ކައުންސިލުން މަޢުލޫމާތު ދެއްވާގޮތުގައި މި ތަމްރީން ޕްރޮގްރާމް އަމާޒުކުރެވިފައިވަނީ ރަށުގެ ދަނޑުވެރިންނާއި، ހައިޑްރޮޕޮނިކްސްއަށް ޝައުޤުވެރިވާ ފަރާތްތަކަށާއި، ސްކޫލްގެ މަތީ ގްރޭޑްތަކުގެ ދަރިވަރުންނަށެވެ. މި ޕްރޮގްރާމުގައި ބައިވެރިވުމަށް ބޭނުންވާ ފަރާތްތަކުން އޭޕްރީލް 24 ވާ ބުރާސްފަތި ދުވަހުގެ 13:00 ގެ ކުރިން ކައުންސިލްގެ 6584030 ނަންބަރު ފޯނަށް ގުޅައި ނަން ނޯޓްކުރުމަށް ކައުންސިލުން އެދިފައިވެއެވެ.

މިފަދަ ތަމްރީން ޕްރޮގްރާމްތަކުގެ މައިގަނޑު މަޤްޞަދަކީ ގޭގޭގެ ހުސްބިންކޮޅުގައި ދަނޑުވެރިކަން ކޮށްގެން ރައްޔިތުންނަށް އެދެވޭ މަންފާއެއް ހޯދައިދިނުމުގެ މަގު ފަހިކޮށްދިނުމެވެ. މިނިސްޓްރީން ދެއްވި މަޢުލޫމާތުގައިވާ ގޮތުން، މިފަދަ ޕްރޮގްރާމެއް މިދިޔަ އަހަރު ބ. ތުޅާދޫގައިވެސް ކުރިއަށް ގެންގޮސްފައިވެއެވެ. އަދި އެރަށުގައި ހައިޑްރޮޕޮނިކްސް ނިޒާމް ޤާއިމްކޮށް، 10 ދަނޑުވެރިއަކަށް ދަނޑުވެރިކަން ކުރެވޭނެ އިންތިޒާމްތައްވެސް ހަމަޖައްސައިދީފައިވާކަމަށް މިނިސްޓްރީން މަޢުލޫމާތު ދެއެވެ.