އެމްޓީސީސީގެ 40 އަހަރުގެ ހަޔާތުގައި އެއް އަހަރެއްގައި އެންމެ ގިނަ މަޝްރޫޢު ހިންގާފައި ވަނީ މިދިޔަ އަހަރު ކަމަށް އެ ކުންފުނީގެ ސީއީއޯ އާދަމް އާޒިމް ވިދާޅުވެއްޖެއެވެ.
ދަތި އުނދަގޫތަކުގެ ތެރެއިންވެސް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީން މިދިޔަ އަހަރު ހޯދި ކާމިޔާބީ ފާހަގަކުރައްވާ ސީއީއޯ އާޒިމް ކުރެއްވި ޓްވީޓެއްގައި ވިދާޅުވީ ކުންފުނިން މި ހޯދި ކާމިޔާބުގެ ސިއްރަކީ ހީވާގި މުވައްޒަފުންގެ މިންނެތް މަސައްކަތް ކަމަށެވެ. އެގޮތުން މުޅި އަހަރުގެ ތެރޭ ޖުމްލަ 34 މަޝްރޫޢެއްގެ މަސައްކަތް އެކުންފުނިން ނިންމާލާފައިވާ ކަމަށެވެ.
އެމްޓީސީސީން މިދިޔަ އަހަރު ނިންމާލި ފާހަގަކޮށްލެވޭ ބޮޑެތި މަސައްކަތްތަކުގެ ތެރޭ ހޯރަފުށީ އެއަރޕޯޓު ތަރައްޤީކުރުމުގެ މަޝްރޫޢާއި، ގދ.މާވަރުލު އެއަރޕޯޓުގެ ޓަރމިނަލާއި އެއަރ އެއަރޕޯޓާއި ގުޅުންހުރި އިތުރު މަޝްރޫޢުގެ އިތުރުން ފުވައްމުލަކު ރިންގު ރޯޑުގެ މަސައްކަތް ފާހަގަކޮށްލެވެއެވެ.
We have completed 34 projects in 2020. During the 40 years of history of MTCC, this is the first time to complete this number of projects in one year. Thank you each and every member of #TeamMTCC for your tireless effort and support to achieve this success. @MTCCPlc pic.twitter.com/qcGWlLQsfh
— Adam Azim (@adamazim) January 1, 2021
2000އެއްހާ މުވައްޒަފުން ވަޒީފާ އަދާކުރާ އެމްޓީސީސީއަށް މުވައްޒަފުން ހޯދުމުގައި ދިވެހިންނަށް ހާއްސަ އިސްކަމެއް އެކުންފުނިން އަންނަނީ ދެމުން ނެވެ. އެގޮތުން މިދިޔަ އަހަރުގެ ތެރޭ އެ ކުންފުނީގެ ކޮންނަ ބޯޓު "މަހާޖައްރާފު" ގެ ފަޅުވެރިން 100 އިންސައްތަ ދިވެހިންނަށް ވަނީ ބަދަލުކޮށްފައެވެ.
ތަފާސް ހިސާބުތައް ދާއްކާގޮތުން މިދިޔަ އަހަރުގެ ފުރަތަމަ 9 މަސް ދުވަހުގެތެރޭ އެކުންފުންނީގެ ޖުމްލަ އާމްދަނީ އަކީ 952 މިލިއަން ރުފިޔާއެވެ. އަދި ސާފު ފައިދާ އަކީ 140 މިލިއަން ރުފިޔާއެވެ. މިއީ އެމްޓީސީސީ ތާރީހުގައިވެސް އަހަރުގެ ފުރަތަމަ 3 ކުއާޓަރގައި ލިބުނު އެންމެ ބޮޑު ފައިދާކަމަށް އެކުންފުނިން އޭރުވަނީ ހާމަކޮށްފައެވެ.
