ސިނގިރޭޓު އެތެރެކޮށް ވިޔަފާރިކުރާ ފަރާތްތަކުން އެ ވިޔަފާރި ދޫކޮށްލައި އެހެން ވިޔަފާރިއަކަށް ބަދަލުވުމަށް ރައީސް ޑރ. މުޙައްމަދު މުޢިއްޒު ގޮވާލައްވައިފިއެވެ. "ރައްޔިތުންނާ އެކު" ނަމުގައި ކުރިއަށްގެންދަވާ ސިލްސިލާ ޕޮޑްކާސްޓުގެ ދެވަނަ އެޕިސޯޑުގައި ވާހަކަފުޅު ދައްކަވަމުން ރައީސް ވިދާޅުވީ، ރާއްޖެއަކީ މިލިއަނުން މީހުން އުޅޭ ޤައުމެއް ނޫންކަމަށާއި މިފަދަ ކުޑަކުޑަ މުޖުތަމަޢެއްގައި ސިނގިރޭޓުގެ ވިޔަފާރި ކުރުމަކީ ކޮށްގެންވާނެ ކަމެއް ނޫންކަމަށެވެ.
ދުންފަތުގެ ބާވަތްތަކުގެ އަގު ބޮޑުކުރުމުގެ މައިގަނޑު މަފްހޫމަކީ ރައްޔިތުން އެކަމުން ސަލާމަތްކުރުން ކަމަށް ރައީސް ފާހަގަކުރައްވައި، އެކަމަކީ ހަމައެކަނި ފަހަރަކު ތަންކޮޅެއް ޓެކްސް ބޮޑުކޮށްގެން ހާސިލުކުރެވޭނެ ކަމެއް ނޫންކަމުގައި ވިދާޅުވިއެވެ. އެގޮތަށް ކަންތައް ކޮށްފިނަމަ، އެއީ ސިނގިރޭޓު އެތެރެކުރާ ފަރާތްތަކަށް އަގު ބޮޑުވާ މިންވަރު އަގަށް އިތުރުކޮށް، ވިޔަފާރި ކުރިއަށްގެންދިއުމަށް ލިބޭ ފުރުޞަތެއްކަމަށްވެސް ރައީސް ފާހަގަކުރެއްވިއެވެ.
ރައީސްގެ ވާހަކަފުޅުގައި ސިނގިރޭޓު ބުއިމާއި ދުންފަތުގެ އިސްތިޢުމާލުކުރުމުން ދުރުހެލިވުމަށް އެންމެހާ ރައްޔިތުންނަށް ގޮވާލައްވައި، މިކަމުން ރާއްޖެ ސަލާމަތްކުރުމަށް އިލްތިމާސްކުރެއްވިއެވެ. "ރައްޔިތުންނާ އެކު" ޕޮޑްކާސްޓަކީ ރައްޔިތުންނާ ގާތުން މަޢުލޫމާތު ހިއްސާކޮށް، ރައްޔިތުންގެ ޚިޔާލުތަކާއި ކަންބޮޑުވުންތައް އަޑުއަހައި، އަދި ރައްޔިތުންގެ ސުވާލުތަކަށް ޖަވާބުދިނުމަށް ރައީސް ކުރިއަށްގެންދަވާ ޕްރޮގްރާމެކެވެ.
