މިއަންނަ އަހަރުގެ ނިޔަލަށް ކޮންމެ ރަށެއްގައިވެސް އައުޓްޑޯ ޖިމެއް ޤާއިމުކުރެވޭނެކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. މިފަދައިން ވިދާޅުވީ "ރައްޔިތުންނާ އެކު" ޕޮޑްކާސްޓްގެ ދެވަނަ އެޕިސޯޑްގައި ވާހަކަފުޅު ދައްކަވަމުންނެވެ.
ރައީސް މުޢިއްޒު ވިދާޅުވީ ޕްރިވެންޓިވް ހެލްތު ކެއަރގެ ތެރެއިން ހާސިލުކުރެވޭނެ އެންމެ މުހިންމު އެއް އަމާޒަކީ ދުންފަތުގެ އިސްތިއުމާލުކުރުމުން ޖީލެއް ދުރުކުރުންކަމަށެވެ. އަދި ޕްރިވެންޓިވް ހެލްތު ކެއަރއަށް މަގުފަހިކުރުމަށް ތަރުކާރީއާއި މޭވާގެ ބާވަތްތަކާއި ރަނގަޅު ކާނާ ފަސޭހައިން ލިބޭނެ މަގު ތަނަވަސްކޮށްދެއްވާކަމަށްވެސް ފާހަގަކުރެއްވިއެވެ.
މޫދުގައި ކުރާ ކަސްރަތަކީ ހަށިގަނޑަށް ވަރަށް ފައިދާހުރި ކަމެއްކަން ފާހަގަކުރައްވައި، މޫދަށް އެރޭނެ ތަންތަން ނެތް ރަށްތަކުގައިވެސް ބަނދަރުހެދުމާއި ގިރާ ސަރަހައްދު ހިމާޔަތްކުރުމުގެ މަޝްރޫޢުތަކުގައި މިހާރު މޫދަށް އެރޭނެގޮތަށް ޚާއްޞަ ތަންތަން ހިމަނުއްވާކަމަށް އެމަނިކުފާނު ވިދާޅުވިއެވެ.
ހަމަމިއާއެކު، ކޮންމެ ރަށެއްގައިވެސް އައުޓްޑޯ ޖިމެއް ޤާއިމުކުރެވޭނެކަމަށް ރައީސް މުޢިއްޒު ވިދާޅުވެފައިވާއިރު، އެމަނިކުފާނުގެ ރިޔާސީ ބަޔާނުގައިވެސް މިކަން ހިމަނުއްވާފައިވާކަން ފާހަގަކުރެއްވިއެވެ. މިފަދަ ޖިމްތައް ޤާއިމުކުރުމަކީ ރައްޔިތުންގެ ޞިއްޙަތު ރަނގަޅުކުރުމަށް އަޅުއްވާ ފިޔަވަޅެއްކަންވެސް އެމަނިކުފާނު ވިދާޅުވިއެވެ.
ކުޑަކުދިންގެ ދުޅަހެޔޮކަމަށްވެސް ސަމާލުކަން ދެއްވާ ކަމަށް ވިދާޅުވަމުން، ރައީސް މުޢިއްޒު ވިދާޅުވީ ކުޑަކުދިން ބޭރަށް ނުކުމެ ހަރަކާތްތެރިވެ އުޅުމަށާއި، އާއިލާއާއެކު ވަގުތު ހޭދަކުރުމަށް ކުޑަކުދިންގެ ޕާކްތައް ޤާއިމުކުރަމުންދާކަމަށެވެ. މިފަދަ ކަންކަމުން ހަށިގަނޑުގެ ދުޅަހެޔޮކަމުގެ އިތުރުން ސިކުނޑިއަށްވެސް ހަމަޖެހުން ލިބިގެންދާނެކަމަށްވެސް ވިދާޅުވިއެވެ.
މި މަސައްކަތްތަކުގެ ތެރޭގައި މާލޭގެ ހަލާކުވެފައިވާ ޕާކުތައް މަރާމާތުކުރުންވެސް ހިމެނެއެވެ. މިގޮތުން ސަލްޓަން ޕާކް "އެޑްވެންޗަރަސް" ކަންކަން ހިމަނައިގެން ތަރައްޤީކުރުމަށް ރޭވިފައިވާކަމަށްވެސް ރައީސުލްޖުމްހޫރިއްޔާ ވަނީ ހާމަކުރައްވާފައެވެ. މި ހުރިހާ މަޝްރޫޢުތަކުންވެސް ހާސިލުކުރަން ބޭނުންވަނީ ޕްރިވެންޓިވް ހެލްތު ކެއަރގެ މަޤްޞަދުތައްކަމުގައި ވިދާޅުވިއެވެ.
