2019ވަނަ އަހަރު ރާއްޖެއަށް ޒިޔާރާތްކުރި ފަތުރުވެރިންގެ ޢަދަދަކީ 1.7 މިލިއަނެވެ. މި ކާމިޔާބާއެކު 2020 ވަނަ އަހަރުފެށީ ރާއްޖެ ޒިޔާރާތްކުރާ ފަތުރުވެރިންގެ އަދަދު 2 މިލިއަނަށް އެރުވުމުގެ އަމާޒުގައި އުންމީދީ އަހަރެއްގެ ގޮތުގައެވެ. 1300 އަށް ވުރެ ގިނަ އެނދު ފަތުރުވެރިންނަށް ހިދުމަތްދޭން އަލަށް ނެރުމަށް 30 ވަރަކަށް ރަށް ރިސޯޓްގެ ގޮތުގައި އަލަށް ތަރައްގީކުރަން ފެށުމުގެ އަމާޒުގައެވެ.
ނަމަވެސް އަހަރު ފެށިގެންއައި އިރު މުޅި ދުނިޔޭގައި ހަލުވި ކަމާއެކު ފެރުމުންދިޔަ ކޮރޯނާގެ ބިރުވެރި ކަމުގެ ތެރޭގައި ރާއްޖެއަށް ބިންދާލި އިޤްތިސާދީ ހީނަރުކަމުގެ ބޮޑު ރާޅަކީ ރާއްޖެ އަންނަ ފަތުރުވެރިންގެ އަދަދު ދައްވާން ފެށުމެވެ. އެހާލަތުގައި ވެސް އަހަރުގެ ފުރަތަމަ 3 މަހު ރާއްޖެއަށް 382،760 ފަތުރުވެރިން ވަނީ އައިސްފައެވެ. އެއީ މާޗް 27 ވަނަ ދުވަހުގެ ނިޔަލަށް ދުވާލަކު އެވްރެޖްކޮށް 4،206 ފަތުރުވެރިން ނެވެ. އޭރު ފަތުރުވެރިން އެވްރެޖް ގޮތެއްގައި ރާއްޖޭގައި 7.6 ދުވަސް ހޭދަކުރެއެވެ.
ކޮރޯނާ ވައިރަސް ރާއްޖެއާ ހަމައަށް ދަތުރުކޮށް މާޗްމަހުގެތެރޭ މާލެއިން ފުރަތަމަ ފަހަރަށް ކޯވިޑްގެ ބަލި މީހެއް ފެނުމާއެކު ރައްކާތެރިކަމުގެ ގޮތުން ރާއްޖޭގެ ބޯޑަރު މާޗް 27 ގައި ބަންދުކުރަން މަޖުބޫރުވުމުން، މުޅި ރާއްޖޭގެ ފަތުރުވެރިކަމުގެ ސިނާއަތް އެއްކޮށް ހުއްޓުނީއެވެ. އުންމީދީ ފެށުމަކުން އަހަރުފެށި ފަތުރުވެރިކަމުގެ ދާއިރާ ނާއުންމީދުން ފުރާލިއެވެ. ދާއިރާގެ އެންމެން ކަރުނައަޅާ ރޯންޖެހޭ ހާލަތަށްދިޔައީ އެމީހުން ކޮންމެ ދުވަހު ކުރަމުންގެންދިޔަ ފަތުރުވެރިންނަށް މެހެމާން ދާރީ އަދާކުރުމުގެ މަސައްކަތް އެއްކޮށް ހުއްޓާލަން ޖެހުމުންނެވެ. ބާރުބޮޑު ވެލާނާ އިންޓަރނޭޝަނަލް އެއައރޕޯޓް ފަޅު ތަނަކަށް ވުމުންނެވެ.
ޖުލައި 15 ވަނަ ދުވަހު ރާއްޖޭގެ ބޯޑަރު އަލުން ހުޅުވާލުމުން ފުރަތަމަ މަހު އުންމީދު ކުރި ވަރަށް ފަތުރުވެރިން ރާއްޖެއައިސްފައެއް ނުވެއެވެ. ނަމަވެސް ބޯޑަރު އަލުން ހުޅުވާލިފަހުން މަހަކަށް ވުރެ މަހެއް ރާއްޖެ އަންނަ ފަތުރުވެރިން ދިޔައީ އިތުރުވަމުންނެވެ. އެގޮތުން ޖުލައިމަހު 1،752 ފަތުރުވެރިން، އޮގަސްޓުމަހު 7،628 ފަތުރުވެރިން، ސެޕްޓެމްބަރުމަހު 9،538 ފަތުރުވެރިން، އޮކްޓޫބަރުމަހު 21،515 ފަތުރުވެރިން، ނޮވެމްބަރު މަހު 35،759 ފަތުރުވެރިން ރާއްޖެއަށް އައިސްފައި ވެއެވެ. މީގެ އިތުރުން ޑިސެމްބަރު މަސް ނިންމާލީ 93،000 އަށްވުރެ ގިނަ ފަތުރުވެރިންނާ އެކުގައެވެ. އެހެންކަމުން އެވްރެޖްގޮތެއްގައި ދުވާލަކު 3000 އަށްވުރެ ގިނަ ފަތުރުވެރިން ޑިސެމްބަރުމަހު ރާއްޖެއަށް ވަނީ އައިސްފައެވެ.
މިފަދަ އުންމީދީ އަދަދުތަކެއް އަހަރުގެ ފަހުކޮޅު ފެނުމުގެ އެންމެ ބޮޑު އެއް ސަބަބަކީ ރާއްޖޭގެ ރައްކާތެރިކަމާމެދު ފަތުރުވެރިންގެ މެދުގައި އޮންނަ އިތުބާރު އިތުރުވުމާއި، ދުނިޔޭގައި ރާއްޖެ ހޯދަމުންދާ ކާމިޔާބީ ތަކެވެ. އެގޮތުން ފާއިތުވި އަހަރު ރާއްޖެއިން ވަނީ ފަތުރުވެރިކަމުގެ ދާއިރާ އަދި ޓްރެވަލް އެންޑް ޓޫރިޒަމްގައި ދުނިޔޭގެ އެންމެ މަތީފެންވަރުގެ އެވޯޑު ހޯދާފައެވެ. ފަތުރުވެރިކަމުގެ ދާއިރާއިން ދޭ އޮސްކާ އެވޯޑުގެ ގޮތުގައި މުޅި ދުނިޔެއަށް މަޝްހޫރު ޝަރަފްވެރި އެވޯޑްކަމަށްވާ "ވޯލްޑް ލީޑިންގ ޑެސްޓިނޭޝަން" އެވޯޑް، ނުވަތަ މުޅި ދުނިޔޭގެ އެންމެ މަގްބޫލު މަންޒިލްގެ އެވޯޑް ފުރަތަމަ ފަހަރަށް ރާއްޖެއިން ވަނީ 2020 ވަނަ އަހަރު ހާސިލްކޮށްފަ އެވެ.
ފަތުރުވެރިކަމުގެ ސިނާއަތުގައި ހަރަކާތްތެރިވާ އެންމެންގެ އެއްބާރުލުމާއެކު 2021 ވަނަ އަހަރު ފަތުރުވެރިކަމުގެ ސިނާއަތް ފަށާފައިވަނީ އަނެއްކާވެސް އައު އުންމީދަކާއެކު 1.5 މިލިއަން ފަތުރުވެރިން ރާއްޖެ ގެނައުމަށް އަމާޒު ހިފައިގެންނެވެ. އަދި 2021 ވަނަ އަހަރު ނިމުމާއެކު ރާއްޖެއިން ކުރިމަތިލާނީ ފަތުރުވެރިކަމުގެ ރަންޔޫބީލް އަހަރާއެވެ. ރާއްޖޭގެ ފަތުރުވެރިކަމުގެ ސިނާއަތަށް 50 އަހަރު ފުރޭނީ 2022 ވަނަ އަހަރުއެވެ.
