ޖަމާއަތް ހަދައިގެން މާރާމާރީ ހިންގައި ބިރުދެއްކުމުގެ ތުހުމަތުގައި ދެ މީހަކު ބަންދުގައި ބެހެއްޓުމަށް ކްރިމިނަލް ކޯޓުން އަމުރުކޮށްފިއެވެ. މިގޮތުން ގއ.ވިލިގިލި، ސޯސަން ވިލާގެ ވިކާޝް އަހުމަދު (25 އަހަރު) އާއި ގދ.ފަރެސްމާތޮޑާ، ފަރެސް އަވަށުގެ އަހުމަދު އީމާން މުހައްމަދު (27 އަހަރު) 5 ދުވަހަށް ބަންދުގައި ބެހެއްޓުމަށް ވަނީ ނިންމާފައެވެ. ކޯޓުން މި ދެމީހުން ބަންދުގައި ބެހެއްޓުމަށް ނިންމީ ތުހުމަތު ވުޖޫދުވާ މިންވަރަށް ހެއްކާއި ގަރީނާ ހުށަހެޅިފައިވާތީއެވެ. މިގޮތުން އަނިޔާ ލިބުނު ފަރާތުގެ ބަޔާނާއި، ސީސީޓީވީ ފުޓޭޖާއި އޭގެ ސްނެޕްޝޮޓް، އަދި އިންޓެލިޖެންސް ރިޕޯޓް ހުށަހެޅިފައިވާ ކަމަށް ކޯޓު އަމުރުގައި ބަޔާންކޮށްފައިވެއެވެ. އަދި މި މައްސަލައަކީ އާންމުންގެ ހިތުގައި ބިރުވެރިކަން އުފެދޭ ގޮތަށް ހިނގާފައިވާ ކަމެއްކަން ފުލުހުން ހުށަހެޅި ލިޔުންތަކުން އެނގޭކަމަށް ކޯޓުން ފާހަގަކޮށްފައިވެއެވެ.
ކޯޓުން މި ދެމީހުން ބަންދުގައި ބެހެއްޓުމަށް ނިންމާފައިވަނީ މުޖުތަމައަށް ނުރައްކަލެއް ކުރިމަތިވެދާނެ ކަމަށް ބެލުމަށްފަހު، ގާނޫނުއަސާސީގެ 49 ވަނަ މާއްދާ އާއި ޖިނާއީ އިޖުރާތުގެ ގާނޫނުގެ 59 ވަނަ މާއްދާ އާއި 60 ވަނަ މާއްދާއަށް ރިއާޔަތްކޮށެވެ. ބަންދުގެ މުއްދަތު ކަނޑައަޅާފައިވަނީ 31 މާރޗް 2025 އިން ފެށިގެން 5 އޭޕްރިލް 2025 ގެ ނިޔަލަށެވެ. ދެމީހުން ވެސް ވަނީ އެމީހުންގެ މައްޗަށް ކުރާ ތުހުމަތުތަކަށް އިންކާރުކޮށްފައެވެ. އަދި ވަކީލަކު އައްޔަންކުރަން ބޭނުންވާ ކަމަށް ބުނެފައިވާތީ، ޝަރީއަތްކުރުމާ ބެހޭ ޖިނާއީ އިޖުރާއަތުގެ ގަވާއިދުގެ 14 ވަނަ މާއްދާގެ ދަށުން 5 ދުވަހަށް ބަންދުގައި ބެހެއްޓުމަށް ނިންމާފައިވާ ކަމަށް ކޯޓުން ބުނެފައިވެއެވެ.
