އައްޑޫ ސިޓީގެ ގުޅިފައިވާ ހަތަރު ރަށުގެ ތެރެއިން ތިން ރަށެއްގައި، އޭގެ ތެރޭގައި އެ ސިޓީގެ ވެރިރަށް ހިތަދޫވެސް ހިމެނޭގޮތަށް، އީދު ބޮކި ނުދިއްލާކަން ފާހަގަކުރެވިއްޖެއެވެ. ހިތަދޫގެ އިތުރުން ދެން އީދުބޮކި ނުދިއްލާ ވަނީ މަރަދޫ އަދި މަރަދޫ ފޭދޫއެވެ.
ލޯކަލް ގަވަރުމަންޓް މިނިސްޓްރީގެ މީގެ ކުރިން ބުނެފައިވަނީ، އީދު ބޮކިތައް ދިއްލަނީ ހުރިހާ ސިޓީތަކާއި ކޮންމެ އަތޮޅެއްގެ ވެރިކަން ކުރާ ރަށާއި އަދި ވެރިކަން ކުރާ ރަށް ނުހިމަނައި އަތޮޅުގެ އެންމެ އާބާދީ ބޮޑު ދެ ރަށުގައި ކަމުގައެވެ. ނަމަވެސް އައްޑޫގެ ތިން ރަށެއްގައި މި ފަހަރު އީދު ބޮކި ނުދިއްލި ސަބަބެއް އެސީގެ ފަރާތުން ރަސްމީކޮށް ހާމަކޮށްފައެއް ނުވެއެވެ.
އެހެންނަމަވެސް، އައްޑޫގައި ކަރަންޓުގެ މައްސަލަ ހައްލުނުވެ ގިނަ ދުވަސްތަކެއް ފާއިތުވެފައިވާއިރު، އައްޑޫގެ ބައެއް ރައްޔިތުން ވަނީ ކަރަންޓުގެ މައްސަލަ ހައްލު ނުކުރެވި އޮއްވާ އީދު ލައިޓްތައް ނުދިއްލުމަށް ގޮވާލާފައެވެ. ހާއްސަކޮށް ރަމަޟާން މަސް ނިމުމާއި ގާތްވަމުން އައިއިރު އިތުރު ޖެނެރޭޓަރަކަށް މައްސަލަ ޖެހި، ކަރަންޓު ކަނޑާ ވަގުތު އިތުރުކޮށްފައިވެއެވެ.
އައްޑޫ ސިޓީގެ ޑެޕިއުޓީ މޭޔަރު ޝުއާއު ވަނީ ފޭސްބުކުގައި ސަރުކާރަށް ފާޑުވިދާޅުވެ، "ބަރަކާތްތެރި ރަމަޟާން މަސް ނިމިގެންދާއިރު، ސަރުކާރުން ފިތުރު އީދަށް ރަށް ދިއްލުމަށް އެންގުމަކީ އައްޑޫ ސިޓީގެ ރައްޔިތުންނަށް ކުރާ ޖެއްސުމެއްބާވައޭ" ސުވާލު ކުރައްވާފައެވެ. ޝުއާއު ވިދާޅުވީ އައްޑޫގެ ކަރަންޓުގެ މައްސަލަ ހައްލުކޮށް ގެތައް ދިއްލުމަށްފަހު ނޫނީ އީދު ލައިޓްސް ހަރުކުރުމަކީ ރައްޔިތުން ބޭނުންވާނެ ކަމެއް ނޫން ކަމުގައެވެ.
އައްޑޫ ސިޓީގެ ގުޅިފައިވާ ރަށްތަކުގެ ތެރެއިން ފޭދޫގައި އީދު ބޮކި ދިއްލާފައިވާކަން ފާހަގެ ކުރެވިފައި ވެއެވެ. އަދި ވަކިން އޮންނަ ހުޅުމީދޫގައިވެސް އީދު ބޮކި ދިއްލާފައިވާކަމަށް ބެލެވެއެވެ. އައްޑޫ ސިޓީގެ ގުޅިފައިވާ ރަށްތަކުގައި ކަރަންޓުގެ ޚިދުމަތް ކެނޑެމުންދާތާ މިހާރު އަހަރެއްހާ ދުވަސް ވެފައިވާއިރު، ރަމަޟާން މަހު ކަރަންޓު ނުކެނޑޭނެކަމުގެ ޔަގީންކަން ފެނަކައިން ދިނެވެ. އެހެންނަމަވެސް މުޅި ރޯދަމަސްވެސް ފާއިތުވެގެން ދިޔައީ އައްޑޫ ކަރަންޓުގެ މައްސަލަ ހައްލު ނުކުރެވިއެވެ. ފެނަކައިން މިހާރުވަނީ ކަރަންޓުގެ މައްސަލަ ހައްލުކުރުމަށް އާ ޖެން ސެޓެއް އެރަށަށް ފޮނުވާފައެވެ.
