އާޒަރުބައިޖާންގެ އަަވަށެއްކަމުގައިވާ ނަގޯނޯ ކަރަބާކުގެ މިލްކުވެރިކަމާއިހެދި އަރުމީނިއާއި އާޒަރުބައިޖާންއާއި ދެމެދު ހަގުރާމަ ހިގަމުން ދަނިކޮށް މިދެގައުމުގެ ފޮރިން މިނިސްޓަރުންގެ މެދުގައި ސުލްހައިގެ ވާހަކަތައް ފެށިގެން ކުރިޔަށް އެބަދެވެ.
އެމެރިކާ، ފްރާންސް އަދި ރަޝިޔާއިން އިސްނަގައިގެން ރަޝިޔާގައި ކުރިޔަށްދާ މިސުލްހައިގެ ވާހަކަތައް މިހާތަނަށް 6 ގަޑިއިރަށް ދިގުދެމިގެން ގޮސްފައިވާއިރު، އަދިވެސް މިދެގައުމުގެ ދެމެދުގައި ކުރެވެމުންދާ ހަގުރާމަ ހުއްޓުމެއްނެތި ކުރިޔަށް އެބަދެއެވެ. މިގޮތުން ކަރަބާކުގެ މިނިވަންކަމަށް ހަގުރާމަކުރަމުންދާ އަރުމީނިއާ ނަސްލުގެ ހަގުރާމަވެރިންގެ ފަރާތުން މައުލޫމާތު ދޭގޮތުގައި ފާއިތުވެދިޔަ 24 ގަޑިއުރުގެ ތެރޭގައި އަޒަރުބައިޖާންގެ 26 ސިފައިވަނީ މަރާލެވިފައެވެ. އަދި ދެގައުމުންވެސް ދަނީ އެއްގައުމު އަނެއްގައުމަށް އިސްވެ ހަމާލެދެމުންދާ ކަމަށް ތުހުމަތު ކުރަމުންނެވެ. އަދި ހަގުރާމަ ހިގަމުންދާ ސަރަހައްދުގެ ބޭރުންވެސް މިސައިލް ހަތިޔާރުގެ ބައެއް ބައިތައް އެގައުމުގެ ސިފައިންނަށް ފެންނަމުންދާކަމަށް އާޒަރުބައިޖާންގެ ރަސްމީ ފަރާތްތަކާ ހަވާލާދީ ރިޕޯޓުތައް ބުނެއެވެ.
ރަޝިޔާ، ފްރާންސް އަދި އެމެރިކާއިން އިސްވެ މިދެގައުމު ސުލްހަ ކުރުމަށް މަސައްކަތްކުރަމުން ދާއިރު، މިދެގައުމުގެ ދެމެދުގައި ހިގަމުންދާ މިހަގުރާމައިގެ ތެރެއަށް ބޭރުގެ އެހެނިހެން ގައުމުތަކުން ނުވަނުމަށްވެސް ބައިނަލް އަގުވާމީ މުޖުތަމަޢުން ދަނީ އިލްތިމާސް ކުރަމުންނެވެ. މިގޮތުން، އާޒަރުބައިޖާންއާއި ނަސްލީގޮތުންނާއި އަދި ސަގާފީގޮތުން ގުޅި ލާމެހިފައވާި ތުރުކީން މިމައްސަލާގެ ތެރެއަށް ނުވަނުމަށް ކެނެޑާއިން ވަނީ އިންޒާރު ދީފައެވެ. ތުރުކީއަކީ ފާޅުގައި އާޒަރުބައިޖާނަށް ތާއީދުކޮށް އަދި ބޭނުންވެއްޖެ ހާލަތެއްގައި އެގައުމަށް އަސްކަރީ އެހީތެރިކަން ފޯރުކޮށްދިނުމަށް ތައްޔާރަށް އޮތްކަމަށް ބުނަމުންދާ ގައުމެކެވެ.
ކަރަބާކްގެ މިނިވަންކަމުގެ މައްސަލާގައި މިދެގައުމުގެ ދެމެދުގައި ކުރެވެމުންދާ މިހަގުރާމައިގައި ދެފަރާތުގެވެސް އާންމު ރައްޔިތުންނަށް ލިބެމުންދާ ގެއްލުންތަކާއިމެދު ޔޫންއެންގެ އިންސާނީ ހައްގުތަކާބެހޭ ހައިކޮމިޝަނަރ މިޝެލް ބެޗްލެޓް ވަނީ ކަންބޮޑުވުން ފާޅުކުރައްވާފައެވެ. މިގޮތުން މިހާތަނަށް އައިއިރު، ދެހަފްތާއަށްވުރެ ގިނަދުވަހަށް ދިގުދެމިގެން ގޮސްފައިވާ މި ހަގުރާމައިގައި މިހާތަނަށް 300 އަށްވުރެ ގިނަމީހުން ކުޑަކުދިންވެސް ހިމެނޭގޮތުން މަރުވެފައިވާ ކަމަށް ކަމާއި ގުޅުންހުރި ބައެއް ފަރާތްތަކުންވަނީ ހާމަކުރައްވާފައެވެ.
ކަރުބާކުގެ މައްސަލަ އާޒަރުބައިޖާންއާއި އަރުމީނިޔާއާއި ދެމެދު އުފެދިފައިވަނީ 1988 ވަނަ އަހަރުއެވެ. އާޒަރުބައިޖާންގެ ސަރަހައްދެއްގެ ގޮތުގައި ބައިނަލް އަގުވާމީގޮތުން ބަލައިގެންފައިވާ ކަރުބާކުގައި ދިރިއުޅެމުންދާ އަރުމީނިއާ ދަރިކޮޅުގެ ރައްޔިތުން ބޭނުންވަނީ އެސަރަހައްދަކީ އަރުމީނިޔާއަށް ނިސްބަތްވާ ސަރަހައްދެއްގެ ގޮތުގައި ދެމިއޮތުމަށެވެ. ކަރުބާކްއަކީ އާޒަރުބައިޖާންގެ ސަރައްދެއްގެ ގޮތުގައި ބައިނަލް އަގުވާމީގޮތުން ބަލައިގެންފައިވީ ނަމަވެސް އެސަރަހައްދުގައި މިހާރުވެސް ވެރިކަން ކުރަމުންދަނީ އެސަރަހައްދުގައި ދިރިއުޅޭ އާރުމީނިއާ ދަރިކޮޅުންނެވެ.
