ކުރީގެ ފިނޭންސް މިނިސްޓަރު ޑރ. މުހައްމަދު ޝަފީގު، މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން (އެމްއައިޑީއެފްޒެޑް) ގެ ސީއީއޯގެ މަގާމަށް މިދިޔަ މަހުގެ 27 ވަނަ ދުވަހު އައްޔަންކުރައްވައިފިއެވެ.
އެސްޓީއޯގެ ދަށުން ހިންގާ މި ކުންފުނި އުފައްދާފައިވަނީ މި ސަރުކާރުންނެވެ. މި ކުންފުނީގެ މައިގަނޑު މަޤްޞަދަކީ ރާއްޖޭގެ އިޤްތިޞާދީ ރައްކާތެރިކަން ކަށަވަރުކުރުމާއި، ވެލިއު އެޑްކުރުމުގެ އިތުރުން ރާއްޖޭގެ ޓްރާންޝިޕްމަންޓް އަދި ރީ-އެކްސްޕޯޓް ވިޔަފާރި ކުރިއެރުވުމެވެ.
މި މަޤާމަށް އައްޔަންކުރެވުނުއިރު، ޑރ. ޝަފީގު މަސައްކަތްކުރައްވަމުން ގެންދެވީ ހައުސިން ޑިވެލޮޕްމަންޓް ފައިނޭންސް ކޯޕަރޭޝަން (އެޗްޑީއެފްސީ) ގެ ޑިރެކްޓަރުންގެ ބޯޑުގައެވެ. އެޗްޑީއެފްސީގެ ބޯޑަށް އޭނާ އައްޔަންކުރެވުނީ ފިނޭންސް މިނިސްޓަރުކަމުން އިސްތިއުފާދެއްވިތާ ތިން މަސްދުވަހެއްހާ ދުވަސް ފަހުންނެވެ. އަދި މީގެ ކުރިން، 2021 އިން 2023 އަށް އެޗްޑީއެފްސީގެ ޗީފް ފައިނޭންޝިއަލް އޮފިސަރު (ސީއެފްއޯ) ގެ މަޤާމުގެ އިތުރުން އެހެނިހެން ސީނިއަރ މަޤާމުތައްވެސް އަދާކުރައްވާފައިވެއެވެ.
ފާހަގަކޮށްލެވޭ ގޮތުގައި، ޑރ. ޝަފީގަކީ ރައީސް ޑރ. މުހައްމަދު މުއިއްޒުގެ ސަރުކާރުގެ ފުރަތަމަ ފިނޭންސް މިނިސްޓަރެވެ. އެ މަޤާމުން އިސްތިއުފާ ދެއްވާފައިވަނީ މިދިޔަ އަހަރުގެ ސެޕްޓެމްބަރު މަހުގެ 30 ވަނަ ދުވަހު ކެބިނެޓަށް ގެނެވުނު ބަދަލުތަކާ ގުޅިގެންނެވެ.
ކޮމެންޓު ފޮނުވާ