އެމްޑީޕީން މިރޭ ބޭއްވި "ފުނޑިއްޖެ، ފުދިއްޖެ" ހިނގާލުމުގައި ގިނައަދަދެއްގެ ބަޔަކު ބައިވެރިވެއްޖެ އެވެ. މި ހިނގާލުމަކީ އެމްޑީޕީން ވަރަށް ދުރާލާ ރާވައިގެން ބޭއްވި ހިނގާލުމެކެވެ. މި ހިނގާލުމުގައި ރަށްރަށުން ވެސް މީހުން ބައިވެރިވެފައިވެއެވެ.
މި ހިނގާލުން ބޭއްވުނީ ގާނޫނުއަސާސީ އަށް ގެނެވޭ ބަދަލުތަކުން ގާނޫނު ހެދުމުގެ ބާރުގެ މިނިވަންކަމާއި ހިޔާލުފާޅު ކުރުމުގެ ހައްގު ހިފެހެއްޓިގެން ދާތީ، އެކަމާމެދު ކަންބޮޑުވުން ފާޅުކުރުމުގެ ގޮތުންނެވެ. ވެރިރަށުގެ މައި މަގުތަކުގައި ކުރިއަށްދިޔަ މި ހިނގާލުމުގައި އެމްޑީޕީގެ ޗެއާޕާސަން ފައްޔާޒް އިސްމާއީލް، ޕާޓީގެ ރައީސް އަބްދުﷲ ޝާހިދު އަދި މާލެ ސިޓީގެ މޭޔަރު އާދަމް އާޒިމް ވަނީ އިސްކޮށް ހަރަކާތްތެރިވެފައެވެ. މީގެ އިތުރުން ޕާޓީގެ އެހެން އިސްވެރިންނާއި، މަޖިލީސް މެންބަރުންނާއި ގިނަ އަދަދެއްގެ އާންމު ރައްޔިތުން ވެސް ވަނީ ބައިވެރިވެފައެވެ.
ހިނގާލުމުގެ ބައިވެރިން ވަނީ ގައުމީ ދިދައާއި އެމްޑީޕީގެ ދިދަ އުފުލައި، ސަރުކާރާ ދެކޮޅު ޝުއޫރުތައް ލިޔެފައިވާ ބެނާތައް ހިފައިގެން ހިނގާލުމުގައި ބައިވެރިވެފައެވެ. އެމްޑީޕީން ސަރުކާރާ ދެކޮޅަށް ބާއްވާ މިފަދަ ފުރަތަމަ ހިނގާލުމަށް ފުލުހުންގެ ފަރާތުން ސެކިއުރިޓީ ބެލެހެއްޓުން ވެސް ވަނީ ފޯރުކޮށްދީފައެވެ.
