މުސްލިމުންނަށް ދިމާވާ މުސީބާތްތަކުގައި އެންމެ ވަރުގަދަ ހަތިޔާރަކަށް ވާންޖެހޭނީ ޤަޟާޤަދަރަށް އީމާންވުންމާއި ކެތްތެރިވުން ކަމުގައި މިއަދުގެ ހުކުރު ޚުޠުބާގައި ވިދާޅުވެއްޖެއެވެ.
"ޤަޟާ ޤަދަރަށް އީމާންވުން" މި މައުޟޫއަށް ޚާއްސަ ކުރެވުނު މިއަދުގެ ހުކުރު ޚުޠުބާގައި ވިދާޅުވީ އީމާންކަމާއި ކެތްތެރިކަމުން ހިމާޔަތް ލިބިގެންފިނަމަ ދުނިޔެއާއި އާޚިރަތުގައި ދަރުމައާއި ސަވާބު ހިސާބެއް ނެތި ދެއްވާނެ ކަމުގައެވެ.
މާތް ﷲގެ ވަޙީ ބަސްފުޅެއްގެ މާނާގައި ވެއެވެ. "ކެތްރެރިންނަށް އެއުރެންގެ ދަރުމަ ދެއްވާހުށިކަން ކަށަވަރީ ހިސާބެއް ނެތިއެވެ."
މިއަދުގެ ޚުޠުބާގައި ވިދާޅުވެފައި ވެއެވެ.
މިއަދުގެ ހުކުރު ޚުޠުބާގައި އިތުރަށް ވިދާޅުވީ ގަޟާގަދަރަށް އީމާންވާ މީހަކު އޭނާގެ ހަޔާތް ހޭދަކުރަމުން ދާނީ ހިތްހަމަ ޖެހުމާ އެކުގައި ކަމުގައެވެ. އަދި ފިތުނައިގެ ސަބަބުން އެފަދަ މީހަކު ގުޑުގުޑު ނާޅާނެ ކަމަށާއި، ދަތި އުދަގޫކަމެއް ދިމާވުމުން އެފަދަ މީހަކު ބަލިކަށިވެގެންވެސް ނުދާނެކަމުގައި ޚުޠުބާގައި ވިދާޅުވެފައި ވެއެވެ.
މިއަދުގެ ޚުޠުބާގައި ވިދާޅުވީ ހުރިހާކަމެއް މެދުވެރި ވެގެންދަނީ މާތް ﷲގެ އިލްމުފުޅާއި އެކަލާނގެ އިރާދަފުޅުންކަން އިޢުތިޤާދުކުރާ ބަޔަކު ބިރުގަނެ، ހިތްނުތަނަވަސްވެ، މާޔޫސްވާން ނުޖެހޭނެ ކަމުގައެވެ. އަދި އޭނާއަށް ދިމާވެފައިވާ ކަންކަމާ، ހިތާމަކޮށް ފުރާނައަށް ގެއްލުމެއް ނުދޭނެކަމަށްވެސް މިއަދުގެ ޚުޠުބާގައި ވިދާޅުވެފައި ވެއެވެ.
މުސްލިމް އަޚުންނޭވެ! މާތް ﷲ މި ކައުނުގައި ލައްވާފައިވާ ހުރިހާ ކަމެއް ލައްވާފައިވަނީ އުޅުތަކުންގެ މަސްލަހަތަށްޓަކައެވެ. އަހަރުމެންނަށް އެކަން އެނގުނުކަމުގައިވިޔަސް، އަދި ނޭގުނު ކަމުގައިވިޔަސް ހިނގާ ހިރިހާ ކަމަކީ އެކަމުގައި އެންމެ މަސްލަހަތު ހުރި ގޮތެވެ. އެކަލާނގެ ހައްދަވާފައިވާ ތަކެއްޗާއި އެ ތަކެއްޗަށް މިންވަރު ކުރައްވާފައިވާ ގޮތް ދެނެވޮޑިގަންނަވަނީ ހަމަ އެކަލާނގެ އެވެ.
މިއަދުގެ ޚުޠުބާގައި ވިދާޅުވެފައި ވެއެވެ.
