ހއ. އިހަވަންދޫއަށް ކުރެއްވި ރަސްމީ ދަތުރުފުޅުގައި އެރަށުގެ ތަރައްޤީއަށް ގިނަ މަޝްރޫޢުތަކެއް ކުރިއަށް ގެންދަވާނެކަމުގެ ޔަގީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވާއިފިއެވެ.
އިހަވަންދޫގެ ރައްޔިތުންނާ ބައްދަލުކުރެއްވުމުގައި ރައީސް ވިދާޅުވިގޮތުގައި، އެރަށުގައި ގާއިމުކުރުމަށް ނިންމާފައިވާ މަސްވެރިކަމުގެ ކޮމްޕްލެކްސްގެ މަސައްކަތް މިއަހަރުގެ މޭ މަހު ފެށި، 18 މަސްދުވަހުގެ ތެރޭގައި ނިންމާލެވޭނެއެވެ. އަދި އިހަވަންދޫ ހޮސްޕިޓަލުގެ އިމާރާތުގެ މަސައްކަތް އަވަސް ސްޕީޑެއްގައި ނިންމުމާއެކު، ކުރިއަށް އޮތް ރަމަޟާން މަހުގެ ކުރިން ޑަޔަލިސިސްގެ ޚިދުމަތް ފެށޭނެކަމަށް ވިދާޅުވިއެވެ.
ރައީސް އިތުރަށް ވިދާޅުވީ އިންތިޚާބުގެ ކެމްޕޭނުގައި ވެވަޑައިގެންނެވި ވައުދާ އެއްގޮތަށް، މިދައުރު ނިމުމުގެ ކުރިން ކުޅިވަރު ކުޅޭނެ ވަސީލަތްތައް ގާއިމުކޮށްދެއްވާނެ ކަމަށާއި، ވަރަށް އަވަހަށް ވެމްކޯގެ ޚިދުމަތްވެސް ރަށުގައި ލިބެން ފަށާނެކަމަށެވެ. މީގެއިތުރުން، އެރަށުގެ ގެދޮރުގެ ދަތިކަން ހައްލުކުރުމަށް 200 ހައުސިންގ ޔުނިޓް އެޅުމުގެ މަޝްރޫޢުވެސް ކުރިއަށް ގެންދަވާނެކަމަށް ވިދާޅުވެފައިވެއެވެ.
ރައްޔިތުންގެ އެދުމާ އެއްގޮތަށް އިހަވަންދޫގެ ބަނދަރާ ގުޅޭ މައްސަލަތައްވެސް ހައްލުކޮށްދެއްވާނެކަމުގެ ޔަގީންކަން ރައީސް ވަނީ ދެއްވާފައެވެ. ރައީސް ރަށްރަށަށް ކުރައްވާ ދަތުރުފުޅުތަކުގައި ގެންދަވަނީ ރަށްރަށުގައި ގިނަ މަޝްރޫޢުތަކެއް ކުރިއަށް ގެންގޮސްދެއްވާނެކަމަށް ވިދާޅުވަމުންނެވެ. އެމަނިކުފާނު ވިދާޅުވެފައިވަނީ ރަށްރަށަށް ވަޑައިގަންނަވަނީ އެރަށްރަށުގައި ކަންކަން ކޮށްދެއްވާނެކަމުގެ ޔަގީންކަން ދެއްވުމަށް ކަމަށެވެ.
