ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހއ. އަތޮޅަށް ކުރައްވާ ދަތުރުފުޅުގައި އިހަވަންދޫގައި އަލަށް ތަރައްޤީކުރެވުނު ދެ ކުޅިވަރު ވަސީލަތެއް ރަސްމީކޮށް ހުޅުވައިދެއްވައިފިއެވެ. މިގޮތުން ހުޅުވައިދެއްވީ އިހަވަންދޫ ހުރަވީ ވޮލީ ކޯޓާއި ހިންނަ ފުޓްސެލް ދަނޑެވެ.
އިހަވަންދޫ ކައުންސިލާއި ކުޅިވަރާއި ހަށިހެޔޮކަމާބެހޭ ވުޒާރާ ގުޅިގެން ތަރައްޤީކުރި އައުޓްޑޯ ވޮލީބޯޅަ ކޯޓު ހުޅުވައިދެއްވުމަށްފަހު ރައީސް މުޢިއްޒު ވަނީ އެތަން ބައްލަވައިލައްވާފައެވެ. އަދި ފުޓްސެލް ދަނޑު ހުޅުވައިދެއްވުމަށްފަހު އެރަށުގެ ޒުވާނުންނާއެކު ވަގުތުކޮޅެއް ހޭދަކުރެއްވިއެވެ.
ރާއްޖޭގެ އެކި ކަންކޮޅުތަކުގައި ކުޅިވަރު ވަސީލަތްތައް ޤާއިމުކުރުމަކީ ރައީސް މުޢިއްޒުގެ ސަރުކާރުން ޚާއްޞަ އިސްކަމެއް ދެއްވާ ކަމެކެވެ. އެގޮތުން އަތޮޅުތަކުގައި ކުޅިވަރު ކުޅޭ ތަންތަނުގެ ޙާލަތު ރަނގަޅުކުރެއްވުމަށް ގިނަ މަސައްކަތްތަކެއް ވަނީ ކުރައްވާފައެވެ. އަދި މަސައްކަތް ހުއްޓިފައިވާ މަޝްރޫޢުތައް ދެ އަހަރުގެ ތެރޭގައި ނިންމަވާނެކަމަށް ވަނީ ވިދާޅުވެފައެވެ.
އިހަވަންދޫގައި ރަސްމީކޮށް ހުޅުވައިދެއްވި މި ދެ ދަނޑަކީ ކައުންސިލުން ކުރިއަށްގެންދިޔަ މަޝްރޫޢުތަކެކެވެ. މި ދަނޑުތަކުގެ މަސައްކަތް ނިންމުމުގައި ކުޅިވަރު ވުޒާރާއިން ވަނީ ބޮޑު އެހީތެރިކަމެއް ފޯރުކޮށްދެއްވާފައެވެ. މިގޮތުން ދަނޑުގެ ވަށައިގެން ފެންސް ޖަހައި، ޓާފް އަޅައި، ޒަމާނީ ފެންވަރަށް ތަރައްޤީކޮށްފައިވާ މި މަޝްރޫޢުތައް ވަނީ މިދިޔަ އެއް އަހަރުދުވަހުގެ ތެރޭގައި ފުރިހަމަކޮށްފައެވެ.
