ގިނަ ރިސޯޓްތަކުން މިހާރު ދަނީ ޑޮލަރު މާރުކުރުމުގެ އައު ޤަވާއިދާ އެއްގޮތަށް އަމަލުކުރަން ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ހއ. އަތޮޅަށް ކުރައްވަމުންގެންދަވާ ދަތުރުފުޅުގައި ހޯރަފުށީގެ ރައްޔިތުންނާ ބައްދަލުކުރައްވައި، މި އަހަރުގެ ޖެނުއަރީ މަހުން ފެށިގެން ތަންފީޒުކުރަން ފެށުނު މި ޤަވާއިދަށް ވަރަށް މަދު ރިސޯޓަކުން ފިޔަވައި އެހެން ހުރިހާ ރިސޯޓްތަކުން އަމަލުކުރަމުންދާކަން ފާހަގަކުރެއްވިއެވެ.
ރައީސް ވިދާޅުވިގޮތުގައި މިހާތަނަށް 25 މިލިއަން ޑޮލަރަށްވުރެ ގިނަ އަދަދެއް ބޭންކުތަކަށް މާރުކުރެވިފައިވާއިރު، މިއީ އެންމެ މަހެއްގައި ލިބެންޖެހޭ އަދަދުގެ ތެރެއިން ބައެއްކަން ފާހަގަކުރެއްވިއެވެ. ޤަވާއިދާ އެއްގޮތަށް މި ކަންކަން ކުރިއަށްދާނަމަ، ކުރިއަށް އޮތް 6 މަސްދުވަހުގެ ތެރޭގައި އިޤްތިސާދީ ހެޔޮ ބަދަލުތަކެއް ފެންނަން ފަށާނެކަމަށާއި، މީގެ ސަބަބުން ވިޔަފާރިވެރިންނާއި، އާންމު ރައްޔިތުންނާއި، ބޭރުގައި ދިރިއުޅޭ ދިވެހިންނާއި ކިޔަވާކުދިންނަށް ވަރަށް ބޮޑެތި ފަސޭހަތަކެއް ލިބިގެންދާނެކަމަށް ވިދާޅުވިއެވެ.
މިދިޔަ އަހަރުގެ ޑިސެމްބަރު 14 ވަނަ ދުވަހު ރައީސުލްޖުމްހޫރިއްޔާ ތަސްދީގުކުރެއްވި މި ޤަވާއިދުގެ ދަށުން، އަހަރަކު މަދުވެގެން 15 މިލިއަން ޑޮލަރުގެ އާމްދަނީ ލިބޭ ޓޫރިޒަމް ވިޔަފާރިތަކުން ބޭރުފައިސާ ބޭންކަށް ޖަމާކޮށް މާރުކުރުން ލާޒިމްކުރެއެވެ. މި ގޮތުން ރިސޯޓްތަކުން ކޮންމެ ޓޫރިސްޓެއްގެ ބޮލަކަށް 500 ޑޮލަރު ނުވަތަ އާމްދަނީގެ 20 އިންސައްތަ، އަދި ގެސްޓްހައުސްތަކުން ބޮލަކަށް 25 ޑޮލަރު ނުވަތަ މަހު އާމްދަނީގެ 20 އިންސައްތަ މާރުކުރަން ޖެހެއެވެ.
ރައީސް މުއިއްޒު އިތުރަށް ވިދާޅުވެފައިވަނީ ޤާނޫނު ފުރިހަމައަށް ތަންފީޒުކުރައްވާނެ ކަމަށާއި، ޑޮލަރު މާރުކުރަންޖެހޭ އެއްވެސް ވިޔަފާރިއަކަށް އިސްތިސްނާއެއް ނުދެއްވާނެ ކަމަށެވެ.
