ރަށްރަށުން މީހުން މާލެއަށް ޖަމާކުރުމަކީ އެ މަނިކުފާނުގެ ސިޔާސަތެއް ނޫން ކަމަށާއި، އަދި އެ މަނިކުފާނުގެ އަމާޒަކީ ސަރަހައްދީ ތަރައްގީއާއެކު ރަށްތަކަށްވެސް އޭގެ މަންފާ ލިބިގެން ދިއުން ކަމުގައި ރައީސް މުހައްމަދު މުއިއްޒު ރޭ ވިދާޅުވެއްޖެއެވެ.
ރައީސް މުއިއްޒު މިހެން ވިދާޅުވީ ތިލަދުންމަތީ ރަށްތަކަށް އެ މަނިކުފާނު އިއްޔެ ހެނދުނު ފެއްޓެވި ދަތުރުފުޅުގައި ހއ. ދިއްދޫގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ. މި ޖަލްސާގައި ވާހަކަފުޅު ދައްކަވަމުން ރައީސް ވަނީ ރިޔާސީ ކެމްޕޭނުގައި ދިއްދޫ ރައްޔިތުންނަށް ވެވަޑައިގެންނެވި ވަޢުދުތަކާއި، އެ ވަޢުދުތައް ފުއްދުމަށް މިހާރު ކުރައްވަމުންދާ މަސައްކަތްތަކުގެ މައުލޫމާތު ހިއްސާކުރެއްވިއެވެ.
ރައީސް މުއިއްޒު ވިދާޅުވީ، ދިއްދޫއަށް މި ސަރުކާރުން ކުރަން ނިންމާފައިވާ ގިނަ ކަންކަމުގެ އަމަލީ މަސައްކަތް މިއަހަރު ތެރޭގައި ފެށިގެންދާނެ ކަމަށެވެ. ކުރީގެ ރައީސް ޔާމީންގެ ސަރުކާރުގައި ހައުސިންގ މިނިސްޓަރުކަން ކުރައްވާފައިވާ ރައީސް މުއިއްޒު ވިދާޅުވީ، މިހާރު އެ މަނިކުފާނުގެ ސަރުކާރުން މުހިންމު މަޝްރޫޢުތައް ރަށްރަށުގައި ހިންގަވަނީ، މާލެއަށް މީހުން ޖަމާކުރުމުގެ ސިޔާސަތު ގަބޫލުފުޅު ނުކުރައްވާތީ ކަމަށެވެ.
ރައީސް މުއިއްޒުގެ ވިސްނުންފުޅުގައި، މާލެ ސަރަހައްދެކޭ އެއްފަދައިން އުތުރާއި ދެކުނުގައިވެސް ހުރިހާ ޚިދުމަތްތަކެއް އެންމެ ފުރިހަމަ ގޮތުގައި ލިބެން ޖެހޭނެއެވެ. މިގޮތުން، ރައީސްގެ ރިޔާސީ މެނިފެސްޓޯގައި ހަތް ރަށެއްގައި އާބަން ސެންޓަރަކާއި، އުތުރާއި ދެކުނުގައި ޑިވެލޮޕްމަންޓް ޒޯނެއް ގާއިމުކުރުމަށް ހިމަނުއްވާފައިވެއެވެ. މިގޮތުން މިދިޔަ ނޮވެމްބަރު މަހު ވަނީ ހަތް އާބަން ސެންޓަރުގެ ގޮތުގައި ތަރައްގީކުރާނެ ހަތް ރަށް ކަނޑައަޅުއްވާފައެވެ.
ދިއްދޫ ރައްޔިތުންނަށް ރިޔާސީ ކެމްޕޭނުގައި ވެވަޑައިގެންނެވި އެންމެ ބޮޑު ވަޢުދަކީ އެ ރަށު ފަޅު ހިއްކައިގެން އެއާޕޯޓެއް އެޅުމުގެ މަޝްރޫޢެވެ. މި މަޝްރޫޢުގެ މަސައްކަތް މިއަހަރު ތެރޭގައި ފެށި، ފަޅު ހިއްކުމާއި، ޝޯ ޕްރޮޓެކްޝަން އަދި ރަންވޭ އާއި އެއާޕޯޓުގެ އިމާރާތްތައް ހެދުމުގެ މަސައްކަތްތައް ބާރު ސްޕީޑުގައި ކުރިއަށް ގެންދަވާނެ ކަމަށް ރައީސް ވިދާޅުވެފައިވެއެވެ. އަދި މި މަޝްރޫޢު ނިމުމުން އެއާޕޯޓު ހުޅުއްވުމަށް ވަޑައިގަންނަވާނީ އެ އެއާޕޯޓަށް ޖައްސާ މަތިންދާބޯޓެއްގައި ކަމަށްވެސް ރައީސް ވިދާޅުވިއެވެ.
