ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ މި އަހަރާއި އަންނަ އަހަރު ޤައުމީ ދުވަސް ރަސްމީކޮށް ފާހަގަކުރާނެ ރަށެއްގެ ގޮތުގައި ހއ. އުތީމު ހަމަޖައްސަވައި އިޢުލާންކުރައްވާފައެވެ.
ހއ. އަތޮޅުގެ 10 ރަށަކަށް ކުރައްވަމުންގެންދަވާ ދަތުރުފުޅުގައި، މިއަދު ހަވީރު އުތީމަށް ވަޑައިގެން ރައީސް މުއިއްޒު ވިދާޅުވެފައިވަނީ، މި ރަށަށް ޒިޔާރަތްކުރެއްވުމުން އެމަނިކުފާނަށް ޤައުމީ އިހުސާސްތަކެއް ކުރެއްވޭ ކަމަށެވެ. އުތީމަކީ ދިވެހި ޤައުމުގެ ބަޠަލު، މުޙައްމަދު ތަކުރުފާނުގެ (ބޮޑުތަކުރުފާނު) އުފަން ރަށް ކަމަށްވާތީ، އުތީމުގެ ފަސްގަނޑުގައި ވަގުތުކޮޅެއް ހޭދަކުރެއްވުމަކީ އަބަދުވެސް ފަޚުރުވެރިވެވަޑައިގަންނަވާ ކަމެއް ކަމުގައި ރައީސް ފާހަގަކުރެއްވިއެވެ.
އުތީމަށް ލިބިފައިވާ މި ޚާއްޞا ޝަރަފާ ގުޅިގެން ރައީސް ވިދާޅުވެފައިވަނީ، ކޮންމެ ދައުރެއްގައި އެއްފަހަރު އުތީމުގައި ޤައުމީ ދުވަސް އާދައިގެ ގޮތަކަށް ފާހަގަކުރެއްވުމަކީ އެދިވަޑައިގަންނަވާ ގޮތް ނޫން ކަމަށާއި، އެމަނިކުފާނު ބޭނުންފުޅުވެވަޑައިގަންނަވަނީ އެކަން މަޝްރޫޢުއެއްގެ ގޮތުގައި ކުރިއަށް ގެންދެވުމަށް ކަމުގައެވެ. އެގޮތުން މި އަހަރާއި އަންނަ އަހަރު، ރަސްމީކޮށް ޤައުމީ ދުވަސް ފާހަގަކުރާނެ ރަށެއްގެ ގޮތުގައި ހއ. އުތީމު ހަމަޖައްސަވައި އެކަން އިޢުލާންކުރައްވާފައިވެއެވެ.
