ހުޅުމާލޭގެ ފުރަތަމަ ފިޔަވަހީގައި ފުލުހުންގެ ފްލެޓްތައް އިމާރާތް ކުރުމުގައި ވަކި ބަޔަކަށް ނާޖާއިޒު ފައިދާ ހޯދައިދިން ކަމަށް ތުހުމަތުކުރެވޭ މައްސަލަ އަވަސް މައްސަލައެއްގެ ގޮތުގައި އެންޓި ކޮރަޕްޝަން ކޮމިޝަން (އޭސީސީ) އިން ތަހުގީގު ކުރަން ފަށައިފިއެވެ. އޭސީސީގެ އޮފިޝަލަކު މި މައުލޫމާތު ޔަގީންކޮށްދެއްވި ނަމަވެސް، ތަހުގީގު ހިނގަމުންދާ މައްސަލައަކަށްވާތީ އިތުރު ތަފްސީލެއް ހާމަކުރައްވާފައެއް ނުވެއެވެ.

މިދިޔަ ބުރާސްފަތި ދުވަހު އޮޑިޓަރ ޖެނެރަލް ނެރުއްވި އޮޑިޓް ރިޕޯޓުގައި ފާހަގަކުރައްވާފައިވާ ގޮތުގައި، މި މަޝްރޫއުގެ ދަށުން މިހާތަނަށް އެއް ބިލިއަން ރުފިޔާ ހޭދަކޮށްފައިވާއިރު، މިހާރުވެސް 355 މިލިއަން ރުފިޔާގެ ގެއްލުން ވަނީ ލިބިފައެވެ. އޮޑިޓް ރިޕޯޓުގައި އިތުރަށް ފާހަގަކުރައްވާފައިވަނީ، ޕޮލިސް ފްލެޓްތައް ނިންމުމަށް ވަކި ބަޔަކަށް ނާޖާއިޒު ފައިދާ ހޯދައިދިނުމުގެ މަގުސަދުގައި، އެއްބަސްވުންތަކަށް ބަދަލުގެނެސް، އެކި ކޮންޓްރެކްޓަރުންނަށް މަސައްކަތް ހަވާލުކޮށް، ނިމޭ މަސައްކަތަށް ފައިސާ ދިނުމުގެ ބަދަލުގައި ކޮންޓްރެކްޓަރުންނަށް ފައިސާ ދޫކޮށްފައިވާ ކަމަށެވެ. އެހެންކަމުން، އޮޑިޓަރ ޖެނެރަލް ވަނީ މި މައްސަލަތައް އޭސީސީއާއި ކަމާގުޅޭ އިދާރާތަކުން ބަލައި، މިކަމުގައި ޝާމިލުވާ ހުރިހާ ފަރާތްތަކާމެދު ފިޔަވަޅު އެޅުމަށް ލަފާދެއްވާފައެވެ.