ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން އިއުލާންކުރެއްވި ކައުންސިލްތަކަށް ފަޅުރަށްތައް ދޫކުރުމުގެ ސިޔާސަތުގެ ދަށުން މިވަގުތު 24 ފަޅުރަށެއް ހޯދުމަށް ޕްރޮޕޯސަލް ހުށަހެޅުމުގެ ފުރުސަތު ހުޅުވާލާފައިވާ ކަމަށް މިނިސްޓަރ އޮފް ލޯކަލް ގަވަރނަންސް އާދަމް ޝަރީފް ވިދާޅުވެއްޖެއެވެ.
މިނިސްޓަރު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، ޕްރޮޕޯސަލް ހުށަހެޅުމަށް ކުރިން ހުޅުވާލެވުނު 28 ފަޅުރަށުގެ ތެރެއިން މިހާތަނަށް 4 ފަޅުރަށެއް ކައުންސިލްތަކާ ހަވާލުކުރުމަށް ވަނީ ނިންމާފައެވެ. މި ގޮތުން ރ. ނެޔޮ، ދ. މަނިމަސްގިލި، ދ. ފެންފުށި އަދި ލ. ބޮޑުމާބުޅެލި ހޯދުމަށް ހުށަހެޅި ކައުންސިލްތަކާ މާދަމާ އެ ރަށްތައް ހަވާލުކުރެވޭނެ ކަމަށް މިނިސްޓަރު ވަނީ ހާމަކުރައްވާފައެވެ.
އިޤްތިޞާދީ މަސައްކަތްތަކަށް ކައުންސިލްތަކަށް ފަޅުރަށް ދޫކުރުމަށް ހުޅުވާލި ފުރުސަތުގައި މިހާތަނަށް ޕްރޮޕޯސަލް ހުށަހަޅާފައިވަނީ ތިން ކައުންސިލަކުންނެވެ. އެއީ ރ. އިނގުރައިދޫ ކައުންސިލަށް ރ. ނެޔޮ، ދ. އަތޮޅު ކައުންސިލަށް ދ. މަނިމަސްގިލި އާއި ދ. ފެންފުށި، އަދި ލ. މާވަށު ކައުންސިލަށް ލ. ބޮޑުމާބުޅަލި ހަވާލުކުރުމަށް ނިންމާފައިވެއެވެ.
މީގެއިތުރުން، އަދިވެސް 24 ފަޅުރަށަކަށް ޕްރޮޕޯސަލް ހުށަހެޅުމުގެ ފުރުސަތު ހުޅުވާލެވިފައިވެއެވެ. މި ރަށްތަކުގެ ތެރޭގައި ހދ. ފަރިދޫ، ހދ. ހިރިނައިދޫ، ށ. ނަރުރިބިދޫ، ށ. ގައްލައިދޫ، ށ. މިގޫދޫ، ނ. ދީފުރަމް، ނ. އިގުރައިދޫ، ރ. ހިބިދޫ، ރ. ހުޅުދޫ، ރ. ކުޑަތުޅާދޫ، ބ. މާއްޑޫ ހުޅުދޫ، ބ. ގާވިލިގިލި، ބ. ދަކަންދޫ، މ. މާހުރާ، ފ. މަކުނުއެރި، ތ. ފެންމީރުފުށި، ތ. ކަކޮޅަސް، ލ. ކަނޑަރަ، ގއ. ވިލިގަލާ، ގއ. މުނަންދުވާ، ގދ. މަނައިދޫ، ގދ. އަކިރަހުއްޓާ، ގދ. ވާރެޔަދުވާ އަދި ގދ. ލޮނުދޫ ހިމެނެއެވެ. މި ފުރުސަތުގައި އެ ކައުންސިލްތަކުގެ އިޚްތިޞާޞްގައި ހިމެނޭ ރަށްތަކުން ފަޅުރަށެއް ހޯދުމުގެ އިތުރުން، ކައިރީގައި ފަޅުރަށް ނެތް ރަށްތަކަށްވެސް ފަޅުރަށް ހޯދުމުގެ ފުރުސަތު ލިބިގެންދާނެއެވެ.
