ތިނަދޫގެ މޭޔަރު ސައުދު އަލީގެ މައްޗަށް ކުރެވޭ ކޮރަޕްޝަންގެ ތުހުމަތައް ބެލުމަށް އޭސީސީން މިއަދު ތިނަދޫ ސިޓީ ކައުންސިލުގެ އޮފީހަށް ވަދެއްޖެއެވެ.
މި މައްސަލައިގައި އާންމު ފަރާތަކުން އޭސީސީއަށް ހުށަހަޅާފައިވާ ޝަކުވާގައި ބުނެފައިވަނީ، ތިނަދޫ ބަނދަރުމަތީގައި ބަހައްޓާފައިވާ ދެ މޮނިއުމަންޓު ހެދުމުގެ މަސައްކަތުގައި އެހެން ކުންފުންޏެއްގެ ނަމުގައި ބިލްތައް ހަދައި، އޭގެ ފައިސާ ސައުދު އަލީގެ އަމިއްލަ ކުންފުނީގެ އެކައުންޓަށް ޖަމާކޮށްފައިވާ ކަމަށެވެ.
ތިނަދޫ ސިޓީން ވާހަކަދެއްކި ފަރާތަކުން މަޢުލޫމާތު ދިންގޮތުގައި، އޭސީސީގެ ޓީމުން މިއަދު ހެނދުނުން ފެށިގެން ކައުންސިލް އޮފީހުގައި ހަރަކާތްތެރިވަމުން ގެންދެއެވެ. އަދި މައްސަލައާ ގުޅުންހުރި އެކި ފަރާތްތަކާ ސުވާލުކުރަމުންދާއިރު، މިހާތަނަށް އޭސީސީގެ ފަރާތުން މިކަމާ ގުޅޭ ރަސްމީ އެއްވެސް ބަޔާނެއް ދީފައެއް ނުވެއެވެ.
ތިނަދޫ ސިޓީ ކައުންސިލާ ގުޅޭ ގިނަ މައްސަލަތަކެއް މީގެ ކުރިންވެސް ފެންމަތިވެފައިވެއެވެ. މީގެ ތެރޭގައި ތިނަދޫއަށް ސިޓީއެއްގެ ދަރަޖަ ހޯދުމަށްޓަކައި ބޮޑެތި އޮޅުވާލުންތަކެއް ހިންގިކަމުގެ ތުހުމަތުތައް ހިމެނެއެވެ. އޭގެ ތެރޭގައި މަރުވެފައިވާ މީހުންނާއި، ކައިރީގައިވާ އެހެން ރަށްރަށުގެ ބައެއް މީހުން ތިނަދޫގެ ރަށްވެހިންގެ ގޮތުގައި ހިމެނިކަމުގެ މައްސަލަ ކޯޓަށް ހުށަހެޅިފައިވެއެވެ.
