އަތޮޅުތަކުގައި ކުރިއަށް ގެންދިއުމަށް ރައީސް ޑރ. މުޙައްމަދު މުޢިއްޒު އިޢުލާންކުރެއްވި ހައުސިންގ މަޝްރޫޢުތަކަށް ކޮންޓްރެކްޓަރުން ހޯދުމަށް ކުރިއަށް އޮތް ހަފްތާ ތެރޭގައި ހުޅުވާލާނެކަމަށް ހައުސިން މިނިސްޓަރު އަބްދުﷲ މުއްތަލިބް ވިދާޅުވެއްޖެއެވެ. މި މަޢުލޫމާތު މިނިސްޓަރު ހާމަކުރެއްވީ ރައީސް މުޢިއްޒު ރ. އަތޮޅަށް ކުރައްވަމުންގެންދަވާ ދަތުރުފުޅުގައި ދައުލަތުގެ މީޑިއާއަށް ދެއްވި އިންޓަވިއުއެއްގައެވެ.
މިނިސްޓަރު މުއްތަލިބް ވިދާޅުވި ގޮތުގައި އެކިއެކި ފައިނޭންސިންގ ސްކީމްތަކުގެ ތެރެއިން މި މަޝްރޫޢުތައް ކުރިއަށް ގެންދިއުމަށް ވަނީ ހަމަޖެހިފައެވެ. މީގެ ތެރޭގައި ދައުލަތުގެ ބަޖެޓުންނާއި، ކޮންޓްރެކްޓަރ ފައިނޭންސިންގ އުސޫލުންނާއި، ކޮންޓްރެކްޓަރާއި ދައުލަތުގެ ބަޖެޓުން ބައެއް ހިމެނޭ ގޮތަށް މަޝްރޫޢުތައް ކުރިއަށް ގެންދިއުން ހިމެނެއެވެ. އަދި ބައެއް ޕްރޮޖެކްޓްތަކަށް ލޯނު ފެސިލިޓީވެސް ހޯދުމަށް ވަނީ ހަމަޖެހިފައެވެ.
ފިނޭންސް މިނިސްޓްރީއާ ގުޅިގެން މި މަޝްރޫޢުތަކުގެ ޓެކްނިކަލް މަސައްކަތްތައް މިހާރު ކުރިއަށްދާ ކަމަށް މިނިސްޓަރު ފާހަގަކުރެއްވިއެވެ. މި ފުރުސަތުތައް ދިވެހި ކުންފުނިތަކާއި ބޭރުގެ ކުންފުނިތަކަށްވެސް ހުޅުވާލެވޭނެއެވެ.
ފާހަގަކޮށްލެވޭ ކަމަކީ، ރައީސް މުޢިއްޒު ކ. ގުޅީގެ ރައްޔިތުންނާ ބައްދަލުކުރެއްވި ދަތުރުފުޅެއްގައި ވިދާޅުވެފައިވަނީ، ސަރުކާރުން އަތޮޅުތަކުގައި ހިންގުމަށް ކަނޑައަޅާފައިވާ ބޯހިޔާވަހިކަމުގެ ހުރިހާ މަޝްރޫޢުތަކެއްގެ އަމަލީ މަސައްކަތް ފެށުމަށް ކޮންޓްރެކްޓަރުން ހޯދުމަށް މި މަހު އިޢުލާންކުރައްވާނެ ކަމަށެވެ.
