ސަރުކާރުގެ ބޯހިޔާވަހިކަމުގެ މަޝްރޫއުތައް ތަންފީޒުކުރާނެ ފަރާތްތައް ހޯދުމަށް މިމަހު ބިޑަށް ހުޅުވާލެއްވުމަށް ނިންމައިފިއެވެ. މިކަން ރައީސް މުއިއްޒު އިއުލާނުކުރެއްވީ ރ. އަތޮޅު އިންނަމާދޫއަށް ކުރެއްވި ދަތުރުފުޅެއްގައި، އެރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.
ސަރުކާރުން މިއަހަރަށް ރާވާފައިވާ އެންމެ ބޮޑު އެއް މަޝްރޫއަކީ ބޯހިޔާވަހިކަމުގެ މަޝްރޫއުތަކެވެ. މިކަމަށްޓަކައި މިއަހަރުގެ ބަޖެޓުގައި 1.8 ބިލިއަން ރުފިޔާ ވަނީ ހިމަނުއްވާފައެވެ. މި ފައިސާ ޚަރަދުކުރައްވާނީ އައު ޕީއެސްއައިޕީ މަޝްރޫއުތައް ހިންގެވުމަށެވެ.
އިންނަމާދޫގެ ރައްޔިތުންނާ މުޚާތަބުކުރައްވަމުން ރައީސް މުއިއްޒު ވިދާޅުވީ، ހައުސިން މިނިސްޓްރީއާއި ފިނޭންސް މިނިސްޓްރީ ގުޅިގެން މިހާރު ކުރިއަށްގެންދަވާ މަސައްކަތްތައް މިމަހުގެ ބާކީ އޮތް ދުވަސްތަކުގެ ތެރޭގައި ނިންމަވައި، މަޝްރޫއުތައް ހިންގަވާނެ ފަރާތްތައް ހޯއްދެވުމަށް ބިޑް ހުޅުވާލައްވާނެ ކަމަށެވެ. މީގެ ތެރޭގައި އިންނަމާދޫގައި އަޅުއްވާ 50 ހައުސިން ޔުނިޓްގެ މަސައްކަތްވެސް ހިމެނެއެވެ. އަދި ކައުންސިލުން ބިން ހަމަޖެއްސެވުމަށްފަހު، ކޮންޓްރެކްޓަރ ހޮވިވަޑައިގަތުމާއެކު މަސައްކަތް ފައްޓަވާނެކަމަށް އެމަނިކުފާނު ވިދާޅުވިއެވެ.
