ރ. އިންނަމާދޫގައި 50 ހައުސިންގ ޔުނިޓާއި ބޯޓު ބިލްޑިންގ ދާއިރާއިން ޒުވާނުން ތަމްރީނުކުރާ މަރުކަޒެއް ޤާއިމުކޮށްދެއްވާނެ ކަމުގައި ރައީސް މުއިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިހެން ވިދާޅުވީ އިންނަމާދޫ ރައްޔިތުންނާ މިރޭ ބައްދަލުކުރައްވައި ވާހަކަ ދައްކަވަމުންނެވެ.
ރައީސް ވިދާޅުވިގޮތުގައި މިއަހަރުގެ ބަޖެޓުގައި ބޯހިޔާވަހިކަމަށް އެންމެ މަތީ އިސްކަމެއް ދެއްވާފައިވާއިރު، އެ ސިޔާސަތުގެ ދަށުން މިމަހުގެ ތެރޭގައި އިންނަމާދޫގައި 50 ހައުސިންގ ޔުނިޓު އެޅުމަށް އިޢުލާނުކުރެވޭނެއެވެ. މި މަޝްރޫޢު ކުރިއަށްގެންދިއުމަށްޓަކައި ކޮންޓްރެކްޓަރުން ހޯދުމާއި، ބިން ކަނޑައެޅުމުގެ މަސައްކަތްތައް ވެސް ފެށިގެންދާނެއެވެ.
އިންނަމާދޫއަކީ ރާއްޖޭގައި އޮޑިދޯނިފަހަރު ބަނުމުގެ މަސައްކަތް އެންމެ ފުޅާ ދާއިރާއެއްގައި ކުރާ ރަށަކަށްވާތީ، އެ މަސައްކަތް އިތުރަށް ފުޅާކުރުމަށް ސަރުކާރުން ޚާއްސަ އަހައްމިއްޔަތުކަމެއް ދެއްވާކަމަށް ރައީސް ފާހަގަކުރެއްވިއެވެ. މިގޮތުން އެރަށުގެ ވަޑިންނަށް ދިމާވެފައިވާ ފައިނޭންސިންގގެ ދަތިތައް ހައްލުކުރުމަށްޓަކައި ބޭންކިންގ ނިޒާމުގެ ތެރެއިން ރަހުނަކާ ނުލައި ލޯނު ނެގޭނެ އިންތިޒާމު ހަމަޖައްސަވައިދެއްވާނެ ކަމަށް ވިދާޅުވިއެވެ.
ސަރުކާރުގެ ސިޔާސަތަކީ އޮޑިދޯނިފަހަރު ބަނުމުގެ ދާއިރާގައި ހަމައެކަނި ދިވެހިން މަސައްކަތްކުރުމަށް މަގުފަހިކުރުން ކަމަށް ރައީސް ވިދާޅުވިއެވެ. އެދާއިރާއަށް ޒުވާނުންގެ ޝައުޤުވެރިކަން އިތުރުކުރުމަށްޓަކައި، ސްކިލްސް ޑިވެލޮޕްމަންޓް މިނިސްޓްރީގެ ދަށުން ތަމްރީނު މަރުކަޒެއް ޤާއިމުކުރެވޭނެއެވެ. އަދި އިންނަމާދޫގައި އޮޑިދޯނިފަހަރު ބަނުމަށް ދޫކުރާ ބިންތައް ދިގު މުއްދަތަށް ކުއްޔަށް ދޫކުރެވޭނެ އިންތިޒާމު ހަމަޖެއްސުމަށްވެސް ސަރުކާރުން މަސައްކަތްކުރައްވާނެ ކަމުގެ ޔަޤީންކަން ރައީސް ދެއްވިއެވެ.
