އޮޑިދޯނިފަހަރު ބަންނަ ވަޑިންނަށް ރަހުނަކާ ނުލައި ލޯނު ދޫކުރުމުގެ އިންތިޒާމު ހަމަޖައްސަވައިދެއްވުމަށާއި، މި ދާއިރާއަށް މީހުން ބިނާކުރުމަށް ރ. އިންނަމާދޫގައި ޚާއްސަ މަރުކަޒެއް ތަރައްޤީކުރައްވާނެ ކަމުގެ ރައީސް މުއިއްޒު ވިދާޅުވެއްޖެއެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިހެން ވިދާޅުވީ އިންނަމާދޫ ރައްޔިތުންނާ މިރޭ ބައްދަލުކުރައްވައި ވާހަކަ ދައްކަވަމުންނެވެ.
އިންނަމާދޫއަކީ ރާއްޖޭގައި އެންމެ ފުޅާ ދާއިރާއެއްގައި އޮޑިދޯނިފަހަރު ބަނުމުގެ މަސައްކަތްކުރާ އެއް ރަށްކަމަށްވެފައި، އެރަށުގެ ގިނަ ވަޑިން ދިމާވެފައިވާ ދަތިތަކާ ގުޅޭގޮތުން ރައީސް ވަނީ މަޝްވަރާކުރައްވާފައެވެ. މި ދާއިރާގެ އެންމެ ބޮޑު ކަންބޮޑުވުމަކީ މަސައްކަތަށް ބޭނުންވާ ފައިސާ ހޯދުމުގައި ހުރި ދަތިކަމާއި، ޒުވާނުން މި ދާއިރާއަށް އައުމުގައި ހުރި ގޮންޖެހުންތަކެވެ.
ރައީސް ވިދާޅުވިގޮތުގައި އޮޑިދޯނިފަހަރު ބަނުމުގެ ދާއިރާއަކީ ދިވެހިންނަށް އިސްކަންދޭ ދާއިރާއެއްގެ ގޮތުގައި ކަނޑައަޅުއްވާފައިވާ ކަމަށާއި، މި ދާއިރާއަކީ މުޅިން ދިވެހިން ހަރަކާތްތެރިވާ ދާއިރާއަކަށް ހެއްދެވުމަށް މަސައްކަތްކުރައްވާނެ ކަމަށެވެ. މީގެ އިތުރުން ރަށްރަށުގައި މިފަދަ މަސައްކަތްތަކަށް ބިން ދޫކުރުމުގައި ހުރި ދަތިތައް ހައްލުކުރުމަށްޓަކައި، 20 އަހަރުގެ މުއްދަތަށް ކައުންސިލްތަކަށް ބިން ކުއްޔަށް ދެވޭނެ އިންތިޒާމު ހަމަޖައްސަވައިދެއްވާނެ ކަމަށްވެސް ވިދާޅުވިއެވެ.
އިންނަމާދޫގެ އެހެނިހެން ތަރައްޤީގެ މަޝްރޫޢުތަކާ ގުޅޭގޮތުން ވާހަކަފުޅު ދައްކަވަމުން، ރައީސް ވަނީ ގެދޮރުގެ ދަތިކަން ހައްލުކުރުމަށް 50 ޔުނިޓުގެ ހައުސިންގ މަޝްރޫޢުއެއް ހިންގަވާނެ ކަމަށާއި، ސްކޫލަށް ޖާގަ އިތުރުކޮށްދެއްވުމާއި، ސިއްޙީ މަރުކަޒުގެ ޚިދުމަތްތައް ފުޅާކުރެއްވުމާއި، ކުޅިވަރުގެ ވަސީލަތްތައް ޤާއިމުކުރެއްވުމާއި، ގިރާ ސަރަހައްދު ހިމާޔަތްކުރެއްވުމާއި، ނަރުދަމާ ނިޒާމުގެ މައްސަލަތައް ހައްލުކުރެއްވުން ހިމެނޭ ގޮތަށް އެންމެހައި މަސައްކަތްތައް ދެ އަހަރު ދުވަހުގެ ތެރޭގައި ނިންމަވާނެ ކަމުގެ ޔަޤީންކަން ދެއްވާފައެވެ.
