ޓޫރިޒަމް މިނިސްޓްރީން އިއްޔެ އާންމުކުރި ތަފާސްހިސާބުތަކުން ދައްކާގޮތުން، މި އަހަރުގެ ޖެނުއަރީ މަހުގެ 20 ވަނަ ދުވަހުގެ ނިޔަލަށް ރާއްޖެއަށް 132,235 ފަތުރުވެރިން ޒިޔާރަތްކޮށްފައިވެއެވެ. މިއީ މިދިޔަ އަހަރުގެ މި މުއްދަތުގައި ރާއްޖެ ޒިޔާރަތްކުރި 120,919 ފަތުރުވެރިންނާ އަޅާބަލާއިރު 9.4 ޕަސެންޓުގެ ކުރިއެރުމެކެވެ.
މި މުއްދަތުގައި ރާއްޖެއަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ ރަޝިޔާއިންނެވެ. އެ ޤައުމުން 16,073 ފަތުރުވެރިން ރާއްޖެއަށް އައިސްފައިވާއިރު، ދެވަނައަށް ޗައިނާއިން 14,208 ފަތުރުވެރިންނާއި، ތިންވަނައަށް އިޓަލީވިލާތުން 14,053 ފަތުރުވެރިން ޒިޔާރަތްކޮށްފައިވެއެވެ. މި މަހުގެ ގިނަ ދުވަސްތަކުގައި ދުވާލަކު 6,000 އަށްވުރެ ގިނަ ފަތުރުވެރިން ރާއްޖެއަށް އައިސްފައިވާއިރު، ތިން ދުވަހެއްގައި މި އަދަދު 8,000 އަށްވުރެ މައްޗަށް ގޮސްފައިވެއެވެ.
ރާއްޖެއަށް ޒިޔާރަތްކުރާ ފަތުރުވެރިންގެ ތެރެއިން 69.6 ޕަސެންޓް މީހުން މަޑުކުރަނީ ރިސޯޓުތަކުގައެވެ. އަދި 25.4 ޕަސެންޓް މީހުން ގެސްޓްހައުސްތަކުގައި މަޑުކުރާއިރު، 2.5 ޕަސެންޓް މީހުން މަޑުކުރަނީ ހޮޓާތަކުގައެވެ. މިހާތަނަށް ރާއްޖޭގައި 173 ރިސޯޓަކާއި، 15 ހޮޓަލަކާއި، 816 ގެސްޓްހައުސްއެއްގެ އިތުރުން 151 ސަފާރީ އުޅަނދު އޮޕަރޭޝަނަށް ގެނެސްފައިވެއެވެ. ފަތުރުވެރިން ރާއްޖެ ގެނައުމަށް މީގެކުރިން ސަރުކާރުން ކުރި ގިނަ މަސައްކަތްތަކުގެ ސަބަބުން ފަތުރުވެރިކަމުގެ ދާއިރާއިން އެކިއެކި ރިކޯޑުތައް ވަނީ ހާސިލުކުރެވިފައެވެ.
