ރާއްޖޭގެ ސަރުކާރު ސްކޫލްތައް ފިނިކުރުމުގެ މަޝްރޫޢު މިއަހަރުގެ ސެޕްޓެމްބަރު މަހުގެ ކުރިން ނިންމާލެވޭތޯ ވަރަށް ބޮޑަށް މަސައްކަތް ކުރައްވަމުން ގެންދަވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
"ކޫލް ސްކޫލް ޕްރޮޖެކްޓް" ގެ ނަމުގައި މި މަޝްރޫޢު ވަނީ 2024 ޖޫން 2 ވަނަ ދުވަހު ކ. މާފުށީ ސްކޫލުން ފައްޓަވާފައެވެ. މިއީ ދެ އަހަރު ތެރޭގައި ނިންމުމަށް ރޭވިފައިވާ މަޝްރޫޢެކެވެ.
ރ. ހުޅުދުއްފާރުގައި މިއަދު ވާހަކަފުޅު ދައްކަވަމުން ރައީސް ވިދާޅުވީ، ހަރުދަނާ ގޮތެއްގައި ރަނގަޅު ފެންވަރެއްގައި، ހިތްހަމަޖެހޭ މާޙައުލެއް ކިޔަވާ ކުދިންނަށް ފަހިކޮށްދިނުމުގެ ސަބަބުން ނުކުންނަ ނަތީޖާ ވެސް ރަނގަޅުވާނެ ކަމަށެވެ. އެހެންކަމުން، ސްކޫލްތަކަށާއި ތަޢުލީމީ ދާއިރާއަށް ބޭނުންވާ ޢުމްރާނީ ތަރައްޤީއާއި އެހެނިހެން ޚިދުމަތްތައް އިތުރުކޮށް ޤާއިމްކޮށްދިނުމަކީ ސަރުކާރުން ވަރަށް އިސްކަމެއް ދެއްވާ ކަމެއް ކަމަށް ރައީސް ވިދާޅުވިއެވެ.
ހުރިހާ ސްކޫލެއް އެއަރކޮންޑިޝަން ކުރުމުގެ މަޝްރޫޢަކީ މި އަމާޒުގައި ފެށި މަޝްރޫޢެއްކަން ފާހަގަކުރައްވަމުން، ކުރިއަށް އޮތް އަށެއްކަ މަސް ތެރޭގައި މި މަޝްރޫޢު ނިންމާލެވޭތޯ މަސައްކަތް ކުރައްވަމުން ގެންދަވާ ކަމަށް ރައީސް ވިދާޅުވިއެވެ. މި މަޝްރޫޢުގެ ދަށުން، އެއަރކޮންޑިޝަން ހަރުކުރުމާއި އޭގެ ހަކަތަ އިޔާދަކުރަނިވި ހަކަތައިން، ޚާއްޞަކޮށް ސޯލާ ޕަވަރ މެދުވެރިކޮށް ފޯރުކޮށްދިނުމުގެ މަސައްކަތް މިހާރު ވަނީ ވަރަށް ރަނގަޅު ހިސާބަކަށް ގޮސްފައެވެ.
ހުޅުދުއްފާރު ސްކޫލުގެ ޖާގައިގެ ދަތިކަން ޙައްލުކުރުމަށް ކުރީ ސަރުކާރުން އަޅަން ފަށާފައިވާ 12 ކްލާސްރޫމުގެ މަސައްކަތް ކޮންޓްރެކްޓަރާ ވާހަކަދައްކައިގެން އަވަހަށް ނިންމާލެއްވުމުގެ މަސައްކަތް ކުރައްވާނެ ކަމަށް ވެސް ރައީސް ވިދާޅުވިއެވެ. އަދި އެ ސްކޫލުގައި އިދާރީ ކަންކަމާއި އެހެނިހެން ޚިދުމަތްތައް ހަރުދަނާކޮށްދެއްވާނެ ކަމުގެ ޔަޤީންކަން ވެސް ދެއްވިއެވެ.
"ކޫލް ސްކޫލް ޕްރޮޖެކްޓް" ގެ ދަށުން އެއަރކޮންޑިޝަން ކުރާއިރު، އެކަމަށް ބޭނުންކުރާ 30 ޕަސެންޓް ކަރަންޓު ނަގާނީ ސޯލާ ޕެނެލް މެދުވެރިކޮށް އިޔާދަކުރަނިވި ހަކަތައިން އުފައްދާ ކަރަންޓުންނެވެ. ރައީސް ވިދާޅުވީ، ޤައުމެއްގައި ތަރައްޤީ ގެނެވޭނީ އިމާރާތް އެކަނި ހެދުމަށްވުރެ، ޒުވާން ޖީލަށް ރަނގަޅު ގޮތުގައި ތަޢުލީމާއި ތަރުބިއްޔަތު ދިނުމުން ކަމަށްވާތީ، ސްކޫލުތަކަށް ބޭނުންވާ ވަސީލަތްތައް ފުރިހަމަކޮށްދިނުމަކީ ޙަޤީޤީ އަދި ވަށައިޖެހޭ ތަރައްޤީއަށް އެންމެ މުހިންމު އެއް ކަންތައް ކަމުގައެވެ.
