އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއާއި އެއަރޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް) ގުޅިގެން ހިންގި އިންޓަރންޝިޕް ޕްރޮގްރާމެއް ނުކުޅެދުންތެރިކަން ހުންނަ 4 ޒުވާނުން ކާމިޔާބުކަމާއެކު ފުރިހަމަކޮށްފިއެވެ. 2024 ވަނަ އަހަރުގެ ޖޫން މަހު ދެ އިދާރާގެ ދެމެދުގައި ސޮއިކުރެވުނު އެއްބަސްވުމެއްގެ ދަށުން ފެށުނު މި ޕްރޮގްރާމަކީ 6 މަސްދުވަހުގެ މުއްދަތަށް ކުރިއަށްގެންދެވުނު ޕްރޮގްރާމެކެވެ.
މި ޕްރޮގްރާމްގެ ދަށުން، އިންޓަރންޝިޕް ފުރިހަމަކުރި ފަރާތްތަކަށް ވެލާނާ އިންޓަރނޭޝަނަލް އެއަރޕޯޓުގައި ހުންނަ އެމް.އޭ.ސީ.އެލްގެ އިދާރާގައި މަސައްކަތްކުރުމުގެ ފުރުސަތު ލިބުނެވެ. އެގޮތުން އެޗްއާރް އަދި އެޑްމިން ދާއިރާއާއި، ލަރނިންގ އެންޑް ޑިވެލޮޕްމަންޓް، ކޯޕަރޭޓް އަދި ޓްރާންސްޕޯޓް ދާއިރާގެ ތަމްރީންތައް އެ ފަރާތްތަކަށް ދެވުނެވެ. އުފާވެރިކަމާއެކު ފާހަގަކުރެވޭ ކަމެއްގެ ގޮތުގައި، އިންޓަރންޝިޕް ފުރިހަމަކުރި 4 ފަރާތުގެ ތެރެއިން އެއް ފަރާތަކަށް އެމް.އޭ.ސީ.އެލްގެ ދާއިމީ ވަޒީފާއެއް ވަނީ ހަމަޖެހިފައެވެ.
އިޖުތިމާޢީ އަދި އާއިލީ ތަރައްޤީއާ ބެހޭ ވުޒާރާއިން ފާހަގަކުރައްވާ ގޮތުގައި މިއީ ނުކުޅެދުންތެރިކަން ހުންނަ ފަރާތްތަކަށް ވަޒީފާގެ ފުރުސަތުތައް ފަހިކޮށްދިނުމަށް ސަރުކާރުން ކުރަމުންދާ މަސައްކަތުގެ ތެރެއިން ހާސިލުކުރެވުނު މުހިންމު ކާމިޔާބީއެކެވެ. އަދި މިފަދަ އިތުރު ފުރުސަތުތައް ފަހިކޮށްދިނުމަށްޓަކައި ކަމާބެހޭ އެހެނިހެން ފަރާތްތަކާ ގުޅިގެން މަސައްކަތްތަކެއް ކުރަމުންދާ ކަމަށްވެސް އެ ވުޒާރާއިން ވަނީ ހާމަކުރައްވާފައެވެ.
އިންޓަރންޝިޕް ނިންމުމުގެ ރަސްމިއްޔާތުގައި އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާގެ ސްޓޭޓް މިނިސްޓަރ އަޙްމަދު އާތިފް އަދި އެމް.އޭ.ސީ.އެލްގެ ޑެޕިއުޓީ މެނޭޖިންގ ޑިރެކްޓަރ މުޙައްމަދު ލަމްއާން ވާހަކަފުޅު ދައްކަވައި، މި ޕްރޮގްރާމްގެ މުހިންމުކަން ފާހަގަކުރެއްވިއެވެ.
