އިންފޮމޭޝަން ކޮމިޝަނަރުގެ ނިންމުމަކާމެދު ހިތްހަމަނުޖެހިގެން ހައިކޯޓުގައި އިސްތިއުނާފުކުރާ މައްސަލަތައް ސުޕްރީމް ކޯޓުން ނުބެލޭނެ ކަމަށް ސުޕްރީމް ކޯޓުގެ ފަނޑިޔާރު މަހާޒު އަލީ ޒާހިރު ވިދާޅުވެއްޖެއެވެ.

މި މައްސަލައިގެ ފެށުން އައީ 2022 ވަނަ އަހަރު ރައިޓް ޓު އިންފޮމޭޝަން އެކްޓިވިސްޓް އަހުމަދު އަފްރާހު އިސްމާއިލް، އަމީނީމަގު ހެދުމުގެ މަޝްރޫއުއާ ގުޅޭ މައުލޫމާތު ހޯދުމަށް ހައުސިން މިނިސްޓްރީއަށް ހުށަހެޅި ހުށަހެޅުމަކާ ގުޅިގެންނެވެ. މިނިސްޓްރީން ގާނޫނީ މުއްދަތުގައި ޖަވާބު ނުދިނުމުން، އަފްރާހު އެ މައްސަލަ އިންފޮމޭޝަން ކޮމިޝަނަށް ހުށަހެޅުމުން، ކޮމިޝަނުން އެ މައުލޫމާތު ދިނުމަށް މިނިސްޓްރީއަށް އަމުރުކުރިއެވެ.

މިނިސްޓްރީން މައުލޫމާތު ނުދީ، އައިކޮމްގެ ނިންމުން ހައިކޯޓުގައި އިސްތިއުނާފުކުރުމުން، އެ ކޯޓުން މިނިސްޓްރީގެ ނިންމުމަށް ތާއީދުކުރިއެވެ. މި މައްސަލަ ދެން ސުޕްރީމް ކޯޓަށް ގެންދެވުނެވެ.

ސުޕްރީމް ކޯޓުގެ ހުކުމުގައި، ފަނޑިޔާރު މަހާޒު ވިދާޅުވެފައިވަނީ މައުލޫމާތު ހޯދައި ލިބިގަތުމުގެ ގާނޫނުގެ 64 ވަނަ މާއްދާގައި ބަޔާންކޮށްފައިވާ ގޮތުން، މިއީ ސުޕްރީމް ކޯޓުން ބެލޭނެ މައްސަލައެއް ނޫންކަމަށެވެ. އެއީ އެ ގާނޫނުގައި ބަޔާންކޮށްފައިވަނީ "ޝަރުއީ ކޯޓުތަކަކުން" ގެ ބަދަލުގައި "ކޯޓަކުން" ކަމަށް ވެފައި، "މި މާއްދާގެ ދަށުން ކުރާ އިލްތިމާސްގެ މަރުހަލާގައި އެކަނި" ކަމަށް ބަޔާންކޮށްފައި އޮތުމުންނެވެ.

އެހެންނަމަވެސް، މައްސަލަ ބެއްލެވި ބެންޗުގެ އަނެއް ދެ ފަނޑިޔާރުން ކަމުގައިވާ އައިޝާ ޝުޖޫން އާއި ޑރ. އަޒްމިރަލްދާ ޒާހިރުގެ ނިންމެވުމުގައި ވަނީ، އަފްރާހު ހޯދަން އެދުނު މައުލޫމާތު ދިނުމަށް މިނިސްޓްރީން އިންކާރުކުރުމާ ގުޅިގެން އިންފޮމޭޝަން ކޮމިޝަނަރުގެ އޮފީހަށް ހުށަހެޅުނު މައްސަލައަކީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގައި ބަޔާންކުރާ އިލްތިމާސްއެއް ކަމަށް ހައިކޯޓުން ކުރި ކަނޑައެޅުން ބާތިލުކުރުމަށެވެ.