ދިވެހިރާއްޖޭގެ ޕަބްލިކް ސަރވިސް އެއްކޮށް ޑިޖިޓަލައިޒް ކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވިސްނުންފުޅު ހުރިކަން އެމަނިކުފާނު އެސްޓޯނިއާގެ ދަތުރުފުޅު ނިންމަވާ ވަޑައިގަތުމުގެ ކުރިން ދައުލަތުގެ މީޑިއާއަށް ހާމަކުރައްވައިފިއެވެ.
ރައީސް ވިދާޅުވީ، އެމަނިކުފާނުގެ އަމާޒަކީ ގިނަ އަހަރުތަކެއް ވަންދެން ކަރުދާހުގައި ރައްކާކުރެވިފައި ހުރި އާކައިވްތައް ޑިޖިޓަލް އާކައިވްއަކަށް ބަދަލުކުރުން ކަމުގައެވެ. މީގެ އިތުރުން، 2040 ވަނަ އަހަރާ ހަމައަށް ދިވެހިރާއްޖެ ތަރައްޤީވެފައިވާ ޤައުމަކަށް ހެދުމުގައި ޑިޖިޓަލައިޒޭޝަންގެ ދައުރު މުހިންމުވާނެ ކަމަށް އެމަނިކުފާނު ފާހަގަކުރެއްވިއެވެ.
ކުރިއަށް އޮތް ފަސް އަހަރު ތެރޭގައި ޑިޖިޓަލް އިކޮނޮމީން ރާއްޖޭގެ ޖީޑީޕީއަށް މަދުވެގެން 15 ޕަސެންޓް ހިއްސާކުރުމަށް އަމާޒުކުރައްވާފައިވާ ކަމަށް ރައީސް މުޢިއްޒު ވިދާޅުވިއެވެ. އަދި މިއީ 2040 ގެ ތަރައްޤީގެ ލަނޑުދަނޑިތައް ހާސިލުކުރުމަށް ކޮންމެހެން ކުރަންޖެހޭ ކަމެއްގެ ގޮތުގައި އެމަނިކުފާނު ފާހަގަކުރެއްވިއެވެ.
އަރޓިފިޝަލް އިންޓެލިޖެންސްގެ ދާއިރާއަށް ޚާއްޞަ އަހައްމިއްޔަތުކަމެއް ދެއްވަމުން، ރާއްޖޭގައި އޭއައި މާސްޓަރ ޕްލޭނެއް އެކުލަވާލައި، ޤައުމީ ތަރައްޤީގައި އޭއައިގެ ދައުރު ފުޅާކުރުމަށް ރާއްވަވާފައިވާ ކަމަށް ވިދާޅުވިއެވެ. މި ދަތުރުފުޅުގައި އެސްޓޯނިއާގެ ތަޖުރިބާއިން އެތައް ކަމެއް ދަސްކުރެއްވުމުގެ ފުރުސަތު ލިބިވަޑައިގަތް ކަމަށްވެސް ރައީސް ފާހަގަކުރެއްވިއެވެ.
އަދި ކުރިއަށް އޮތް 3-4 އަހަރު ތެރޭގައި ސަރުކާރުގެ އެންމެހާ ޚިދުމަތްތަކާއި، ޕަބްލިކް ސަރވިސްގެ މަސައްކަތްތަކާއި، ތަޢުލީމީ އަދި ޞިއްޙީ ދާއިރާ އެއްކޮށް ޑިޖިޓަލައިޒްކުރުމަށް ރޭވިފައިވާ ކަމަށްވެސް ރައީސް މުއިއްޒު ވިދާޅުވިއެވެ. މި މަސައްކަތުގައި ދިވެހި ރައްޔިތުންނާއި މުވައްޒަފުންގެ އެއްބާރުލުން ފުރިހަމައަށް ލިބޭނެ ކަމުގެ ޔަޤީންކަން އެމަނިކުފާނު ފާޅުކުރެއްވިއެވެ.
