ރާއްޖޭގައި މިއަހަރު ފުރަތަމަ ހުޅުވުނު ރިސޯޓްގެ ގޮތުގައި މެރިއޮޓް އިންޓަނޭޝަނަލްގެ އަށްވަނަ ރިސޯޓް ހުޅުވައިފިއެވެ. ޓޫރިޒަމް މިނިސްޓަރު ފައިސަލް ހުޅުވައިދެއްވި މި ރިސޯޓަކީ އެނބޫދޫ ފަޅުގައި ހިއްކައިގެން ތަރައްގީކޮށްފައިވާ 82 ކޮޓަރީގެ ރިސޯޓެކެވެ. މި ރިސޯޓް ހުޅުވުމުގެ ރަސްމިއްޔާތު މިމަހުގެ 12 ވަނަ ދުވަހު ބޭއްވުނެވެ.
މިނިސްޓަރު ފައިސަލް ވިދާޅުވެފައިވާ ގޮތުގައި، މިއަހަރު ތެރޭގައި އިތުރު ރިސޯޓްތަކާއި ގެސްޓްހައުސްތަކެއް ހުޅުވިގެންދާނެއެވެ. އޭގެ ތެރޭގައި، ފޭދޫ ފިނޮޅު ފަޅުގައި ޗައިނާގެ ކުންފުންޏަކުން ތަރައްގީކޮށްފައިވާ އައު ރިސޯޓެއް ދުސިތާނީ ކުންފުނިން މެނޭޖްކުރާ ގޮތަށް މާރިޗު މަހުގައި ހުޅުވުމަށް ހަމަޖެހިފައިވެއެވެ.
މެރިއޮޓް އިންޓަނޭޝަނަލް އަކީ ރާއްޖޭގައި އެންމެ ފުޅާ ދާއިރާއެއްގައި އިންވެސްޓްކޮށްފައިވާ ބޭރުގެ ބްރޭންޑެވެ. މި ކުންފުނިން މިހާރު ރާއްޖޭގައި ހިންގަމުންދަނީ ލެ މެރީޑިއަން، ސެއިންޓް ރީޖަސް، ޝެރަޓަން، ޖޭޑަބްލިއު މެރިއޮޓް، ޑަބްލިއު މޯލްޑިވްސް އަދި ވެސްޓިން މޯލްޑިވްސް މިރިއަންދޫ ރިސޯޓް ހިމެނޭގޮތުން ޖުމްލަ އަށް ރިސޯޓެވެ.
