ކުރީގެ ސަރުކާރުން މާލޭ މީހުންނަށް ގޯތި ދިނުމަށް ހިންގި 'ބިންވެރިޔާ' ސްކީމުން ނުހައްގުން ގޯތި ދީފައިވާ ފަރާތްތަކުގެ އަތުން، އެ ގޯތިތައް އަތުލާނެ ކަމަށް ހައުސިންގ އެންޑް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތޮލިބު މިއަދު ވިދާޅުވެއްޖެއެވެ. މިކަން މިގޮތަށް ކުރިއަށް ގެންދާނީ އެ ގޯތީގެ ރަޖިސްޓްރީ ދީ، ވަށާފާރު ރާނާފައި ވީނަމަވެސް ކަމަށް މިނިސްޓަރު ވިދާޅުވެފައިވެއެވެ.
މިނިސްޓަރު މި ވާހަކަ ވިދާޅުވެފައިވަނީ، 'ގެދޮރުވެރިޔާ' ފްލެޓް ލިސްޓް ރިވިއު ކުރުމާ ގުޅޭގޮތުން ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ކުރެވުނު ސުވާލަކަށް ޖަވާބު ދެއްވަމުންނެވެ. މިނިސްޓަރު ފާހަގަކުރެއްވި ގޮތުގައި، ބިންވެރިޔާ ސްކީމުގެ ދަށުން ބައެއް ފަރާތްތަކަށް ނުހައްގުން ގޯތި ދިންކަމުގެ ތުހުމަތުތަކެއް އެބަހުއްޓެވެ. މީގެ ތެރޭގައި ގޯއްޗެއް އޮތް މީހަކަށް ގޯތި ނެތްކަމަށް ދައްކައިގެން ގޯތި ދިނުމާއި، މާލެއަށް އުފަން ނޫން ފަރާތްތަކަށް ގޯތި ދިނުމުގެ މައްސަލަތައް ހިމެނެއެވެ.
އެކަހަލަ ކަންތައްތައް ހުރިއްޔާ އަޅުގަނޑުމެން އިރާދަކުރެެއްވިއްޔާ ބަލާނަން. އަޅުގަނޑު މި ތަނުގައި ވެސް ދަންނަވާލަން ބޭނުންވޭ، ގޯތި ރަޖިސްޓްރީ ދީފައި، ގޯތި ހަވާލުކޮށްފައި އޮތް ކަމުގައި ވިޔަސް އަދި އެ ތަނުގައި ވަށާފާރު ރާނާފައި އޮތް ކަމުގައި ވިޔަސް، ޝަރުތު ހަމަނުވާ މީހަކަށް ބިމެއް ދީފައި އޮތް ކަމުގައި ވަންޏާ، އަޅުގަނޑުމެން އެ މީހެއްގެ އަތުން އެ [ގޯތި] އަތުލާނަމޭ، އެ ފިޔަވަޅު އަޅާނަމޭ.
މިނިސްޓަރު ވިދާޅުވި އެވެ.
މިނިސްޓަރު ވިދާޅުވި ގޮތުގައި، މި ތުހުމަތުތަކުގެ ޙަޤީޤަތް ބަލައި ކަށަވަރުކުރެވޭނެއެވެ. މި ސްކީމަކީ މާލޭ ރައްޔިތުންނަށް ބޯހިޔާވަހިކަން ފޯރުކޮށްދިނުމުގެ މަތިވެރި މަގުސަދެއްގައި ހިންގުނު ސްކީމެއް ކަމަށާއި، މީގެ އުސޫލުތަކާ ހިލާފަށް ނުވަތަ ކޮރަޕްޝަނުގެ ޢަމަލުތައް ހިންގައިގެން ގޯތި ހޯދާފައިވާ ފަރާތްތަކުގެ މައްސަލަތައް ބެލުމަށްފަހު އެ ގޯތިތައް އަތުލެވޭނެއެވެ. މި މަސައްކަތް ފެށޭނީ ހުޅުމާލެ ފޭސް 2 އިން ދޫކޮށްފައިވާ ގޯތިތަކުންނެވެ.
މިނިސްޓަރު އިތުރަށް ވިދާޅުވި ގޮތުގައި، ސްކޭމްތަކުގެ ތެރެއިން ނުވަތަ މިނިސްޓްރީ އަދި އެޗްޑީސީގެ ތެރެއިން އޮޅުވާލައިގެން، ޝަރުތު ހަމަނުވާ ފަރާތްތަކަށާއި އިޢުލާންކުރެވުނު ލިސްޓުގައި ނުހިމެނޭ ފަރާތްތަކަށް ގޯތި ދީފައިވާނަމަ، އެ ގޯތިތައްވެސް އަތުލެވޭނެއެވެ.
މީގެއިތުރުން، ބޯހިޔާވަހިކަމުގެ މަޝްރޫޢުތަކާ ގުޅުވައިގެން ފްލެޓާއި ގޯތި ދޫކުރާނެ ކަމަށް ބުނެ މިހާރުވެސް ސްކޭމްތައް ހިންގަމުންދާކަމުގެ މަޢުލޫމާތު ލިބެމުންދާ ކަމަށް މިނިސްޓަރު ވިދާޅުވިއެވެ. އެފަދަ ސްކޭމްތަކުގައި ރައްޔިތުން ނުޖެހުމަށް މިނިސްޓަރު އިލްތިމާސްކުރައްވައި، ދެތިން ލައްކަ ރުފިޔާ ދީގެން ގޯތި ގަތުމަށް މަސައްކަތް ނުކުރުމަށް އާންމު ރައްޔިތުންނަށް ގޮވާލެއްވިއެވެ. އަދި ފްލެޓް ލިސްޓަށް ނަން ލައިދޭނެ ކަމަށް ބުނެ އުޅޭ ފަރާތްތަކުގެ ވާހަކަތަކަށް އިޖާބަ ނުދިނުމަށްވެސް އޭނާ އިލްތިމާސްކުރެއްވިއެވެ.
