ވެރިކަންކުރާ މައި ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ) އަށް މެމްބަރުން ވެއްދުމަށް ސައްހަނޫން ފޯމުތަކެއް ހުށަހެޅިފައިވާކަން ފާހަގަކުރެވި، އެކަން ބަލަމުންދާކަމަށް އެ ޕާޓީން މިއަދު ނެރުނު ނޫސްބަޔާނެއްގައި ބުނެފިއެވެ.
ޕީއެންސީން ހާމަކުރިގޮތުގައި، މުޅި ރާއްޖެއަށް ހުޅުވާލައިގެން ހިންގި "މެމްބަރޝިޕް ޑްރައިވް" ގައި ޕާޓީގެ އެކްޓިވިސްޓުންނާއި ހެޔޮއެދޭ ފަރާތްތަކުގެ އެހީތެރިކަމާއެކު އެތައް ހާސް ފޯމެއް އިލެކްޝަންސް ކޮމިޝަނަށް ހުށަހެޅުނެވެ. ނަމަވެސް މި ފޯމުތަކުގެ ތެރޭގައި މަދު އަދަދެއްގެ ސައްހަނޫން ފޯމު ހިމެނޭކަން ފާހަގަކުރެވިފައިވާކަމަށް އެޕާޓީން ބުނެފައި ވެއެވެ.
ޕާޓީގެ އިލެކްޝަންސް ޕޯޓަލް މެދުވެރިކޮށް ފޯމުތައް އަޕްލޯޑްކުރެވުނު ނަމަވެސް، ފޯމުތަކުގެ ސައްހަކަން ކަށަވަރުކުރުމުގެ ގާބިލުކަން ޕާޓީއަށް ލިބިފައިނުވާތީ، އިލެކްޝަންސް ކޮމިޝަނަށް ފޯމު ހުށަހެޅުމުގެ ފަހު މަރުހަލާގައި މިފަދަ މައްސަލަތައް ދިމާވަމުންދާކަމަށް ފާހަގަކޮށްފައިވެއެވެ. މިއީ ހަމައެކަނި ޕީއެންސީއަށް ދިމާވާ މައްސަލައެއް ނޫންކަންވެސް އެ ޕާޓީން ފާހަގަކޮށްފައިވެއެވެ.
އެކި ފަރާތްތަކުން ޕާޓީގެ ނަމުގައި ސައްހަނޫން ފޯމުތައް ހުށަހަޅާފައިވާކަމަށް ޝަކުވާ ހުށަހެޅިފައިވާތީ، އިލެކްޝަންސް ކޮމިޝަނުންނާއި ފުލުހުން މި މައްސަލަ ބަލަމުންދާކަން އަންގާފައިވާ ކަމަށާއި، މި ތަހުގީގަށް ޕާޓީގެ ފަރާތުން ފުރިހަމަ އެއްބާރުލުން ދޭނެކަމަށް ޕީއެންސީން ބުނެފައިވެއެވެ.
މީގެއިތުރުން، ޕާޓީން އަމިއްލައަށްވެސް މި މައްސަލަ ބަލަމުންދާ ކަމަށާއި، ސައްހަނޫން ފޯމުތަކެއް މެދުވެރިކޮށް ޕާޓީއަށް މެންބަރުން އިތުރުކޮށް ރައްޔިތުންގެ ހައްގުތަކަށް އުނިކަމެއް ލިބޭފަދަ އެއްވެސް ކަމަކީ ޕާޓީގެ ރައީސް އަދި ލީޑަރޝިޕުން ގަބޫލުކުރާނެ ނުވަތަ ހިތްވަރުދޭނެ ކަމެއް ނޫންކަމަށް ބުނެފައިވެއެވެ.
ޕީއެންސީން ވަނީ ސައްހަނޫން ފޯމެއް މެދުވެރިކޮށް ޕާޓީއަށް ވެއްދުމުގެ މައްސަލައެއް ދިމާވެފައިވާ ފަރާތްތަކުން އެކަން ޕާޓީގެ ރަސްމީ އީމެއިލް އެޑްރެސް [email protected] އަށް ހުށަހެޅުމަށް އިލްތިމާސްކޮށްފައެވެ.
