ކުރީގެ ނައިބު ރައީސް އަދި މިހާރުގެ މޯލްޑިވްސް އިންޓަނޭޝަނަލް ފައިނޭންޝަލް ސާވިސް އޮތޯރިޓީގެ ޗެއާމަން އަބްދުﷲ ޖިހާދުގެ މައްޗަށް ހުށަހެޅިފައިވާ މައްސަލަ އަލުން ބަލަން ޖެހޭނެ ކަމަށް ހައި ކޯޓުން މިއަދު އަމުރު ކޮށްފިއެވެ.
މި މައްސަލައަކީ 2013 ވަނަ އަހަރު ޖިހާދު ފިނޭންސް މިނިސްޓަރުގެ މަޤާމުގައި ހުންނެވިއިރު، ފުށިދިއްގަރުފަޅުގެ އެއްބަސްވުމުގައި ސޮއިކުރެއްވުމާ ގުޅިގެން ހުށަހެޅިފައިވާ މައްސަލައެކެވެ. ދައުލަތުން ބުނާ ގޮތުގައި އޭނާ ސޮއިކުރެއްވީ ދައުލަތަށް ފައިދާވާން އޮތް ކަމެއްގައި އެނޫން ގޮތަކަށް އަމަލުކުރައްވައިގެންނެވެ.
ކްރިމިނަލް ކޯޓުން މި މައްސަލަ ކުރިއަށް ނުގެންދެވޭނެކަމަށް ނިންމުމާ ގުޅިގެން، ދައުލަތުން އެ މައްސަލަ ހައި ކޯޓުގައި އިސްތިއުނާފް ކުރިއެވެ. މިއަދުގެ ހުކުމުގައި ތިން ފަނޑިޔާރުންގެ އިއްތިފާގުން ނިންމަވާފައިވަނީ، ދަށު ކޯޓުން މައްސަލަ ބޭރުކޮށްލި ޤާނޫނީ އަސާސް ސާފުނުވާތީ، މައްސަލަ އަލުން ކްރިމިނަލް ކޯޓުގައި ކުރިއަށް ގެންދަންޖެހޭނެ ކަމަށެވެ.
މީގެ ކުރިން މި މައްސަލައިގައި ހައި ކޯޓުން ދެ ނިންމުމެއް ނިންމާފައިވެއެވެ. އެގޮތުން، ފުރަތަމަ ފަހަރު ޖިހާދުގެ އެޑްރެސް ނޭނގޭ ކަމަށް ބުނެ މައްސަލަ ބޭރުކޮށްލިއެވެ. ދެވަނަ ފަހަރު މައްސަލަ ހުށަހެޅުމުން، އިސްތިއުނާފް މުއްދަތު ހަމަވެފައިވާތީ މައްސަލަ ބަލައިނުގަތުމަށް ނިންމިއެވެ. ނަމަވެސް، އެ ނިންމުން މުރާޖައާކުރުމަށްފަހު މައްސަލަ ބަލައިގަނެ، މިއަދު ވަނީ އަލުން ކްރިމިނަލް ކޯޓަށް ފޮނުވުމަށް ނިންމާފައެވެ.
