އެމްޑީޕީގެ އެތެރޭގައި ކުރިމަތިވި ހިޔާލު ތަފާތުވުންތަކާ ގުޅިގެން އެޕާޓީއާއި ދުރަށް ގޮސް، ޑިމޮކްރެޓްސް ޕާޓީ އުފެއްދުމުގައި އިސްކޮށް އުޅުއްވި ގިނަ ބޭފުޅުންތަކެއް ރޭ އެމްޑީޕީއާ އަލުން ގުޅިވަޑައިގެންފިއެވެ.
މީގެ ތެރޭގައި ރިޔާސީ އިންތިހާބުގައި ޑިމޮކްރެޓްސްގެ ރަނިންމޭޓުގެ ގޮތުގައި ވާދަކުރެއްވި އެސްޓީއޯގެ ކުރީގެ އެމްޑީ ހުސެން އަމްރު، ކުރީގެ ރައީސް އޮފީސް މިނިސްޓަރު މުހައްމަދު ޝިފާޒު، އަދި މެދުހެންވޭރު ދާއިރާގެ ކުރީގެ މެންބަރު އަލީ އާޒިމް ހިމެނިވަޑައިގަންނަވައެވެ.
މި ބޭފުޅުން އެމްޑީޕީން ވަކިވެވަޑައިގަތީ ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި އެ ޕާޓީގެ އެތެރޭގައި އުފެދުނު ބޮޑެތި ހިޔާލު ތަފާތުވުންތަކާ ގުޅިގެންނެވެ. އޭރު އެމްޑީޕީ އޮތީ އިބްރާހިމް މުހައްމަދު ސޯލިހުގެ ފެކްޝަނާއި، ކުރީގެ ރައީސް އަދި އޭރުގެ މަޖިލިސް ރައީސް މުހައްމަދު ނަޝީދަށް ވަފާތެރި ފެކްޝަނުގެ ގޮތުގައި ދެ ބަޔަކަށް ބެހިފައެވެ. މި ބައިބައިވުމާ ގުޅިގެން ޕާޓީން ވަކިވެވަޑައިގެންނެވި ބޭފުޅުން ގުޅިވަޑައިގެން އުފެއްދެވީ ޑިމޮކްރެޓްސް ޕާޓީއެވެ.
އެމްޑީޕީގެ އިސް ލީޑަރުން އަނބުރާ ޕާޓީއާ ގުޅިވަޑައިގަންނަވާ މި ދަނޑިވަޅަކީ، އެމްޑީޕީން "ގާނޫނުއަސާސީގެ ދިފާއުގައި" މި މަހުގެ 31 ވަނަ ދުވަހު މާލޭގައި އެއްވުމެއް ބޭއްވުމަށް ތައްޔާރުވަމުންދާ ދަނޑިވަޅެކެވެ.
