އިންޑިއާގެ ސިޔާސީ މަސްރަހަށް ވަނުމަށް ގެންގުޅުއްވި ވިސްނުން ބަދަލުކޮށް، އޭނާގެ ސިއްޙީ ހާލަތަކީ، "ކަލާނގެ ދެއްވި އިންޒާރެއް" ކަމުގައި ވިދާޅުވެ، ސިޔާސީ އިންޑިއާގެ ސިޔާސީ މަސްރަހަށް ނުވަނުމަށް، އެގައުމުގެ މަޝްހޫރި ފިލްމީ ތަރި، ރަޖްނީކާންތު ނިންމަވައިފިއެވެ.
އިންޑިއާގެ ސިޔާސީ މަސްރަހަށް ނުވަނުމަށް ނިންމިކަން އުމުރުން 70 އަހަރުގެ ރަޖްނީކާންތު، އަންގާރަ ދުވަހު އިއުލާން ކުރައްވާގައި މިވަނީ، ލޭގެ ޕްރެޝަރ މަތިވެގެން ހޮސްޕިޓަލުގައި އެޑްމިޓްކޮށްގެން އޭނާއަށް ފަރުވާދިނުމަށްފަހު، ހޮސްޕިޓަލުން ދޫކޮށްލިތާ 1 ދުވަސް ފަހުންނެވެ.
މުޅި އޭޝިއާގައިވެސް ހުރި އެންމެ އަގުބޮޑު ފިލްމީ ތަރީގެ ގޮތުގައި ފާހަގަވެފައިވާ، ރަޖްނީކާންތުވަނީ، އޭނާގެ އުފަން ސްޓޭޓްކަމަށްވާ ޓެމިލްނާޑޫ ސްޓޭޓް ކޮރަޕްޝަނާ ފަސާދައިން މިންޖުކުރުމަށްޓަކާ، ސިޔާސީ ޕާޓިއެއް އުފައްދަވާނެކަމަށް މި ޑިސެމްބަރު މަހުގެ ކުރީކޮޅު އިއުލާން ކުރައްވާފައެވެ. އަދި އޭނާއަށް ތާއީދުކުރާ އެތައްބަޔަކު ގެންދިޔައީ، އޭނާ އާ ސިޔާސީ ޕާޓީއެއް އުފެއްދުން ކުލަގަދަކޮށް ފާހަގަކުރަން ތައްޔާރު ވަމުންނެވެ.
އެހެންނަމަވެސް، ބަސް ޑްރައިވަރެއްގެ ގޮތުގައި މަސައްކަތް ކުރުމަށްފަހު ފިލްމީ ދާއިރާއަށް ނުކުންނެވި ރަޖްނީކާންތު، އަމިއްލަ ޓުވިޓަރ އެކައުންޓުގައި އާންމު ކުރެއްވި ދިގު ލިޔުމެއްގައި ހާމަކޮށްފައިވަނީ، ހާލަތު ހުރިގޮތުން، ސިޔާސީ ޕާޓީއެއް އުފައްދަވާ އިންޑިއާގެ ސިޔާސީ މަސްރަހަށް ނިކުތުމަށް ކުރެއްވި ޕްލޭނާ އެއްގޮތަށް ކުރިޔަށް ވަޑައިގެންނެވެން ނެތްކަމުގައެވެ.
"ސިޔާސީ ޕާޓީއެއް އުފެއްދުމަށް ނިންމާފައިވާ ނިންމުން އަހަރެން ބަދަލު ކޮށްފައިވާ ވާހަކަ ވަރަށް ހިތާމައާއި އެކު ދަންނަވަން" ސިއްޙީ އެތަކެއް މައްސަލަތަކެއް ކުރިމަތިވެފައިވާ ރަޖްނީކާންތު ވިދާޅުވެފައި ވެއެވެ.
"ސިޔާސީ މަސްރަހަށް ނުވަދެ، ރައްޔިތުންނަށް ޚިދުމަތް ކުރެވެން އޮތް ކޮންމެ ގޮތަކަށް ޚިދުމަތް ކުރުންމަތީ އަހަރެން ދެމިހުންނާނަން" ތަމަޅަބަހުން ލިޔެ އާންމު ކޮށްފައިވާ ލިޔުމެއްގައި ރަޖުނީކާންތު ވިދާޅުވެފައި ވެއެވެ.
ރަޖުނީކާންތު ވިދާޅުވި ގޮތުގައި، ވަރުގަދަ ކެންޕޭނެއް ފެށުމަށްފަހު، ކެމްޕޭން ނުނިންމާ ވަކިވެ ދިއުމަކީ އޭނާ ގަބޫލު ކުރާ އުސޫލެއް ނޫންކަމުގައެވެ.
އިންޑިއާގެ ސިޔާސީ މަސްރަހަށް ވަދެވަޑައިގަންނަވަން ބޭނުންވާކަން އެންމެ ފުރަތަމަ ރަޖުނީކާންތު އިއުލާން ކުރެއްވީ 2017 ވަނަ އަހަރުއެވެ. އަދި އޭނާއަށް ތާއީދުކުރާ އެތައްބައެއްގެ ދިގު އިންތިޒާރަށް ނިމުން އައީ، އޭނާ އުފައްދަވާ ސިޔާސީ ޕާޓީން، ޓެމިލްނާޑޫއަށް، ތެދުވެރި، އަދި އިޚްލާސްތެރި ސިޔާސީ ބަދަލުތަކެއް ގެނެސްދޭނެކަން މިމަހު އޭނާ އިއުލާން ކުރެއްވުމާއި އެކުއެވެ.
ފިލްމީތަރި ރަޖުނީކާންތު، އޭނާއަށް އޮތް ސިޔާސީ ތާއީދު އެންމެ ފުރަތަމަ ހާމަކޮށްދިނީ، 1996 ވަނަ އަހަރު، ޓެމިލްނާޑޫ ސްޓޭޓުގެ ވެރިކަމުގައި އޭރުއޮތް ޕާޓީ ކަމުގައިވާ 'އޯލް އިންޑިއާ އަންނާ ޑްރަވިޑަ މުންނެތުރާ ކަޒަގަމް' (AIADMK) ޕާޓީއާ ދެކޮޅަށް ވޯޓުދިނުމަށް އޭނާ ގޮވާލެއްވުމާ ގުޅިގެން، އެޕާޓީއަށް އެއަހަރުގެ އިންތިޚާބު ނާކާމިޔާބު ވެގެން ދިޔަ ހިސާބުންނެވެ.
އޯލް އިންޑިއާ އަންނާ ޑްރަވިޑަ މުންނެތުރާ ކަޒަގަމް ޕާޓިއަކީ، އިންޑިއާގެ ދެކުނުގެ މިސްޓޭޓްގެ ސިޔާސީ މަސްރަހުގައި 50 އަހަރުވަންދެން ނުފޫޒު ގަދަކޮށް އޮތް ޕާޓީއެކެވެ.
ސިއްޙީ ހާލަތު ދަށަށް ދިޔަ ނަމަވެސް، ރަޖްނީކާންތު ގެންދަވަނީ އޭނާގެ ފިލްމީ ހަޔާތް ކުރިތަށް ގެންދަވަމުންނެވެ. މިގޮތުން، އޭނާ ފާއިތުވެދިޔަ ހަފްތާގައި ހޮސްޕިޓަލުގައި އެޑްމިޓް ކުރެވުނު އިރުވެސް އޭނާ ގެންދެވީ އޭނާގެ އެންމެ ފަހުގެ ފިލްމުގެ ޝޫޓިން ހައިދަރު އާބާދުގައި ކުރިޔަށް ގެންދަވަމުންނެވެ.
