އަލް ހިޖުރަ ޓްރެވަލްސް އެންޑް ޓުއާސް އިން އުމްރާގެ އަޅުކަމަށް ގޮސް އަނބުރާ ރާއްޖެ ނާދެވިތިބި އުމްރާވެރިން މާދަމާ ރާއްޖެ އަންނާނެ ކަށް، އިސްލާމިކް މިނިސްޓަރ ޑރ މުހައްމަދު ޝަހީމް އަލީ ސައީދު ވިދާޅުވެފެއެވެ.
މި މައްސަލަ ފުރަތަމަ ފާހަގަކުރެވުނީ ބުދަ ދުވަހުގެ ރޭގައެވެ. އެއީ އަލް ހިޖުރަ ޓްރެވަލްސްގެ ދަށުން އުމްރާއަށް ގޮސްފައިވާ 23 މީހަކު ރާއްޖެ ނާދެވި ތާށިވެފައިވާކަން އެނގުނު ވަގުތެވެ. އިސްލާމިކް މިނިސްޓަރ ވިދާޅުވެފައިވަނީ އެ މީހުން ރާއްޖެ ގެނެވެންދެން އެ މީހުންގެ ކަންކަން ބެލެހެއްޓުމުގެ ޒިންމާ ހައްޖު ކޯޕަރޭޝަނާ ހަވާލުކުރެވިފައިވާ ކަމަށެވެ.
މިނިސްޓަރ ފަހުން ކުރެއްވި ޕޯސްޓެއްގައި ވިދާޅުވެފައިވަނީ މިހާރު އެ އުމްރާވެރިން ވަނީ މިނިސްޓްރީގެ އިރުޝާދުގެ ދަށުން ހައްޖު ކޯޕަރޭޝަންގެ އުމްރާވެރިން ތިބި ހޮޓަލަށް ބަދަލުކުރެވިފައި ކަމަށާއި، އަދި ޖެނުއަރީ 11 ވަނަ ދުވަހުގެ ހެނދުނު 8:10 ގައި ޤަތަރު އެއަރވޭސްގެ ފްލައިޓަކުން އެ ފަރާތްތައް މާލެ ގެނެވޭނެ ކަމަށެވެ.
މި މައްސަލައިގައި އިސްލާމިކް މިނިސްޓްރީން ވަނީ އަލް ހިޖުރަ ޓްރެވަލްސް އެންޑް ޓުއާސް ޕްރައިވެޓް ލިމިޓެޑްގެ އުމްރާ ދަތުރުތަކުގެ ހުއްދަ ބާޠިލުކޮށް، 100,000 ރުފިޔާއިން ޖޫރިމަނާކޮށްފައެވެ. އެ ކުންފުނިން ވަނީ އުމްރާވެރިން ދެއްކި ފައިސާއިން ދެކޮޅު ޓިކެޓު ހަމަނުޖައްސައި، އެ ފައިސާ ކުންފުނީގެ އެހެން ކަންކަމަށް ބޭނުންކޮށްފައިވާކަން އިއުތިރާފްވެފައެވެ. މިކަމުގެ ސަބަބުން، މައްކާއިން ރާއްޖެ އައުމަށް ޓިކެޓު ނެތުމުން އުމްރާވެރިން ވަނީ ދަތި ހާލުގައި ޖެހިފައެވެ.
މިނިސްޓްރީން މި މައްސަލައިގައި އިތުރު ފިޔަވަޅުތަކެއްވެސް އަޅާފައިވެއެވެ. މީގެ ތެރޭގައި އަލް ހިޖުރަ ޓްރެވަލްސްގެ އުމްރާ ދަތުރުތަކުގެ ހުއްދަ ހިފެހެއްޓުމާއި، އެ ކުންފުންޏާއި އޭގެ ހިއްސާދާރުން ހިމެނޭ އެހެން ކުންފުނިތަކަށްވެސް އުމްރާ ދަތުރުތަކުގެ ހުއްދަ ނުދިނުމަށް ނިންމުން ހިމެނެއެވެ. އަދި މީގެ އިތުރުން، އުމްރާވެރިން ރާއްޖެ ގެނައުމަށް މިނިސްޓްރީން ކުރާ ޚަރަދު އެ ކުންފުނިން ހޯދުމަށާއި، މި މައްސަލަ ތަޙްޤީޤުކޮށް ޤާނޫނީ ފިޔަވަޅު އެޅުމަށްޓަކައި ފުލުހުންނަށް ހުށަހެޅުމަށްވެސް ވަނީ ނިންމާފައެވެ.
