އައިއެސް ޓެރަރިސްޓް ޖަމާއަތުގެ މީޑިއާ ކެމްޕޭނުތައް ހިންގުމުގައި އިސްކޮށް ހަރަކާތްތެރިވާ ކަމަށް ތުހުމަތުކުރެވޭ ހޫދު މުހައްމަދު ޒާހިރު ބަންދުން ދޫކޮށްލުމަށް ކްރިމިނަލް ކޯޓުން ނެރުނު އަމުރު ބާތިލުކުރުމަށް ހައި ކޯޓުން އިއްޔެ ނިންމައިފައިފިއެވެ.
ކްރިމިނަލް ކޯޓުން ހޫދު ބަންދުން ދޫކޮށްލާފައިވަނީ ބަންދު މުރާޖައާ ކުރުމަށް އޭނާ އެދުމުން، ދެ ފަރާތުން ދެއްކި ވާހަކަތަކަށް ރިއާޔަތްކުރުމަށްފަހުގައެވެ. ފުރަތަމަ އޭނާ ބަންދުން ދޫކޮށްލީ މިދިޔަ އަހަރުގެ އޮކްޓޯބަރު 16 އިން ޑިސެމްބަރު 15 އަށެވެ. އޭގެފަހުން މުއްދަތު ހަމަވާން ކައިރިވެފައި ވަނިކޮށް، ހޫދުގެ ފަރާތުން ސިޓީއެއް ފޮނުވުމާ ގުޅިގެން މުއްދަތު އިތުރުކޮށްދީފައިވަނީ މިދިޔަ އަހަރުގެ ޑިސެމްބަރު 15 އިން މި އަހަރުގެ ފެބްރުއަރީ 12 އަށެވެ.
ދައުލަތުގެ ފަރާތުން މި އަމުރު އިސްތިއުނާފު ކުރުމުން، ހައި ކޯޓުން ނިންމާފައިވަނީ ކްރިމިނަލް ކޯޓުން ބަންދުން ދޫކޮށްލާފައިވަނީ ޓެރަރިޒަމް މަނާކުރުމުގެ ޤާނޫނުގެ އިޖުރާއަތްތަކާ ޚިލާފަށް ކަމަށެވެ. ހައި ކޯޓުން ފާހަގަކުރި ގޮތުގައި ކްރިމިނަލް ކޯޓުން ރިއާޔަތްކޮށްފައިވަނީ ޖިނާއީ އިޖުރާއަތުގެ ޤާނޫނަށް ކަމަށާއި، ނަމަވެސް ހޫދުގެ މައްޗަށް ދަޢުވާ އުފުލާފައިވަނީ ޓެރަރިޒަމް މަނާކުރުމުގެ ޤާނޫނުގެ ދަށުންނެވެ. މި ޤާނޫނުގައި ޝަރީޢަތް ނިމެންދެން ބަންދުކުރާ މީހުންގެ ބަންދު މުރާޖަޢާކުރުމަށް ޚާއްޞא އިޖުރާއަތުތަކެއް ކަނޑައަޅާފައިވެއެވެ. އެގޮތުން ބަންދު މުރާޖަޢާކުރުމަށް ހުށަހެޅޭނީ ޕްރޮސެކިއުޓަރ ޖެނެރަލްގެ އޮފީހަށް ފެނިއްޖެ ހިނދެއްގައި އެ އޮފީހަށެވެ.
މި މައްސަލަ ނިންމާފައިވަނީ ކޯޓުގެ އިސް ފަނޑިޔާރު ހުސައިން ޝަހީދު، ބެންޗުގެ ރިޔާސަތު ބެލެހެއްޓެވި މުޙައްމަދު ފައިޞަލް އަދި މުޙައްމަދު ނިޔާޒު ހިމެނޭ ތިން ފަނޑިޔާރުންގެ އިއްތިފާޤުންނެވެ.
ހޫދުގެ މައްޗަށް އުފުލާފައިވާ ދަޢުވާތަކަށް އޭނާވަނީ ޝަރީޢަތުގައި އިންކާރުކޮށްފައެވެ. އޭނާގެ މައްޗަށް ދައުލަތުން އުފުލާފައިވާ ދަޢުވާތަކުގެ ތެރޭގައި އިންޓަނެޓް މެދުވެރިކޮށް ޓެރަރިޒަމްގެ ޢަމަލެއް ކުރުމަށް ހިތްވަރުދިނުމާއި، ޓެރަރިސްޓް ޖަމާޢަތެއްގެ ލިޔެކިޔުންތައް ފެތުރުމާއި، އެފަދަ ޖަމާޢަތެއްގެ މެންބަރަކަށްވުމާއި، ތާއީދުކުރުމާއި، އަދި އެފަދަ ޖަމާޢަތަކަށް ތާއީދުކުރާކަން ދޭހަވާ ލިޔުމެއް، ކުރެހުމެއް ނުވަތަ ފޮޓޯއެއް ގެންގުޅުމުގެ ކުށް ހިމެނެއެވެ.
