ކުރީގެ ނައިބު ރައީސް އަބްދުﷲ ޖިހާދުގެ ދިރިއުޅުއްވާ ތަނެއް ނޭނގިގެން، ޗިޓު ރައްދު ނުކުރެވި، ކުރިއަށް ނުގެންދެވި އޮތް މައްސަލަ ހައިކޯޓުން މިއަދު އަލުން ތާވަލުކޮށްފިއެވެ. މި ޝަރީއަތް ފެށުމަށް މިއަދު ހަމަޖެހިފައިވަނީ މިއަދު މެންދުރުފަހު 2:00 ގައެވެ.
ޖިހާދު ދިރިއުޅުއްވާ ތަނެއް ނޭނގޭތީ މައްސަލައިގެ ޗިޓު ރައްދު ނުކުރެވިގެން ދައުލަތުން ކުރި އިސްތިއުނާފު މައްސަލަ ހައިކޯޓުން ކުރިން ބޭރުކޮށްލާފައި ވަނިކޮށް، ރާއްޖެއިން ބޭރުގައި އުޅުއްވުމަށްފަހު ޖިހާދު އަނބުރާ ވަޑައިގެންނެވުމާ ގުޅިގެން ޕްރޮސެކިއުޓަރ ޖެނެރަލްގެ އޮފީހުން އަލުން މައްސަލަ ހުށަހެޅިއެވެ. މި މައްސަލަ ދެފަހަރެއްގެ މަތިން ހައިކޯޓުން ބޭރުކޮށްލުމަށްފަހު، ފަހުން ވަނީ އަލުން ބަލައިގަނެފައެވެ.
މި މައްސަލައަކީ ފުށިދިއްގަރުފަޅާ ގުޅޭ ޖިނާއީ ދަޢުވާއެކެވެ. ފިނޭންސް މިނިސްޓަރުކަމުގެ މަޤާމުގައި ހުންނަވައިގެން، ދައުލަތަށް ފައިދާއެއް ލިބެން އޮތް ކަމެއްގައި އެނޫން ގޮތަކަށް ޢަމަލުކުރެއްވި ކަމުގެ ދަޢުވާއެވެ. ފުށިދިއްގަރުފަޅު ތަރައްޤީކުރުމުގެ ޖޮއިންޓް ވެންޗަރ އެއްބަސްވުމުގައި ސޮއިކުރެވުނީ 2013 ވަނަ އަހަރުގެ ޖެނުއަރީ 18 ވަނަ ދުވަހުއެވެ. އެއްބަސްވުމުގައިވާ ގޮތުން، ޖޮއިންޓް ވެންޗަރ ކުންފުނީގައި ދިވެހި ސަރުކާރުގެ ހިއްސާއަކީ 25 އިންސައްތައެވެ.
ފުށިދިއްގަރުފަޅު ތަރައްޤީކުރުމަށް ބޭރުގެ ކުންފުންޏަކަށް ދިނުމަށް ނިންމާފައިވަނީ ކުރީގެ ރައީސް މުޙައްމަދު ނަޝީދުގެ ވެރިކަމުގައެވެ. ނަމަވެސް އެއްބަސްވުމުގައި ސޮއިކުރެވުނީ ރައީސް ޑރ. މުޙައްމަދު ވަޙީދު ޙަސަން މަނިކުގެ ވެރިކަމުގައެވެ.
މީގެ އިތުރުން، މޯލްޑިވްސް އިންޓަނޭޝަނަލް ފައިނޭންސް ސަރވިސަސް އޮތޯރިޓީގެ ޗެއަރޕާސަންގެ މަޤާމުގައި ހުންނެވި ޖިހާދުގެ މައްޗަށް އިތުރު ދަޢުވާއެއްވެސް ކުރެވުނެވެ. އެއީ ނައިބު ރައީސްކަމުގެ މަޤާމުގައި ހުންނެވިއިރު، ދިރިއުޅުއްވުމަށް ދައުލަތުން ހަމަޖައްސަވައިދެއްވާފައިވާ ރެހެންދި ފްލެޓް ހުސްނުކުރެއްވުމުގެ މައްސަލައެވެ. 2020 ވަނަ އަހަރުގެ ފެބްރުއަރީ 17 އާ ހަމައަށް ސަރުކާރުން ދޫކޮށްފައިވާ ދެ އެޕާޓްމަންޓް ހުސްނުކުރައްވައި ބޭނުންކުރެއްވުމުގެ ދަޢުވާގައި، ކުލީގެ ގޮތުގައާއި މެއިންޓަނަންސް އަދި ޔުޓިލިޓީ ފީގެ ގޮތުގައި 1,109,227.36 ރުފިޔާ އެއްފަހަރާ ދައުލަތަށް ނަގައިދިނުމަށް ސިވިލް ކޯޓުގައި ދައުލަތުން އެދުނެވެ. ނަމަވެސް އެ މައްސަލަ ދައުލަތުން ވަނީ ފަހުން އަނބުރާ ގެންގޮސްފައެވެ.
