ރާއްޖޭގެ ބައެއް ސަރަހައްދުތަކުގައި ވައިގެ ފެންވަރު ދަށްވެ، ސިއްޙަތަށް ނުރައްކާވެދާނެ މިންވަރަށް ގޮސްފައިވާތީ އޮތޯރިޓީތަކުން އިންޒާރުދީފިއެވެ. މިއީ ދުމާއި ވައި ތަޣައްޔަރުވުމުގެ ސަބަބުން ދުރު ފެންނަ މިންވަރު ދަށްވެފައިވާ ދަނޑިވަޅެކެވެ.
މޯލްޑިވްސް މީޓިއޮރޮލޮޖިކަލް ސަރވިސް (މެޓް އޮފީސް) އިން ބުނީ އިންޑިއާ ބައްރުން އަންނަ ދުމުގެ ސަބަބުން ރާއްޖޭގެ ޖައްވު ތަޣައްޔަރުވެފައިވާ ކަމަށެވެ. މިއީ އިރުވައި މޫސުމުގެ (ޖެނުއަރީން މާރޗަށް) ފެށުމުގައި އާންމުކޮށް ފެންނަ މަންޒަރެކެވެ.
މެޓް އޮފީހުން ބުނާ ގޮތުގައި ސާފު ދުވަހެއްގައި ދުރު ފެންނަ މިންވަރު 10 ކިލޯމީޓަރަށް ދެއެވެ. ނަމަވެސް އުތުރުގެ ސަރަހައްދުތަކުގައި ވައިގެ ފެންވަރު ދަށްވެ، ދުމުގެ ސަބަބުން ފެންނަ ދުރުމިން ވަނީ ތިން ކިލޯމީޓަރަށް ދަށްވެފައެވެ. މި ހާލަތު އަންގާރަ ދުވަހު މެދުރާއްޖެއާއި މާލޭ ސަރަހައްދަށް ފޯރާނެ ކަމަށް ލަފާކުރެވެއެވެ. ނަމަވެސް ވައިގެ ބާރުމިނާއި ވައިހުރި ދިމާލަށް ބަލާއިރު، ދެކުނު ސަރަހައްދުގެ ވައިގެ ފެންވަރު ދަށްވާނެ ކަމަށް ނުބެލެވެއެވެ.
ވައިގެ ފެންވަރު މާރޗު މަހާ ހަމައަށް އާންމު ހާލަތަށް އަނބުރާ ރުޖޫޢަވާނެ ކަމަށް ބެލެވޭއިރު، ކުރިއަށް އޮތް ދުވަސްތަކުގައި ދުން މަޑުމަޑުން ރަނގަޅުވާނެ ކަމަށް ލަފާކުރެވެއެވެ.
މިއާއެކު، ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ވަނީ ވައިގެ ފެންވަރު ދަށްވުމުގެ ސަބަބުން ދިމާވެދާނެ ސިއްޙީ މައްސަލަތަކަށް ސަމާލުވުމަށް އިލްތިމާސްކޮށްފައެވެ. އެ އޮތޯރިޓީން ގޮވާލާފައިވަނީ ނޭވާލުމުގެ ބަލިތަކާއި، ހިތުގެ ބަލިތަކާއި އަދި އެކި ބާވަތުގެ އެލަރޖީ ހުންނަ ފަރާތްތަކުން ބޭރުގައި ހޭދަކުރާ ވަގުތު މަދުކުރުމަށާއި، ބޭރަށް ނިކުންނައިރު މާސްކު ބޭނުންކުރުމަށެވެ. އަދި ކުޑަކުދިންނާއި، ބަލިވެއިން މައިންނާއި، އުމުރުން ދުވަސްވީ މީހުން ވީވަރަކުން ދުން އޮތް ދުވަސްވަރު ގޭގައި ތިބުމަށްވެސް ބާރުއަޅާފައިވެއެވެ.
މިފަދަ ހާލަތެއް ވަނީ މިދިޔަ އަހަރުގެ އިރުވައި މޫސުމުގެ ފެށުމުގައިވެސް ފެނިފައެވެ. އޭރު ދުރު ފެންނަ މިންވަރު 5 ކިލޯމީޓަރަށް ދަށްވިއެވެ.
