ފެޑެކްސް ކޫރިއާ ސާވިސް މެދުވެރިކޮށް ރާއްޖެއަށް މަސްތުވާތަކެތި އެތެރެކުރިކަމަށް ސާބިތުވެ، ކްރިމިނަލް ކޯޓުން މިދިޔަ އާދީއްތަ ދުވަހު އައްޑޫ ހިތަދޫ، ޖީބްރޯލްޓާ، ޝަރުވާން ސަލީމްގެ މައްޗަށް އުމުރަށް ޖަލަށްލުމަށް ހުކުމް ކޮށްފިއެވެ.
ޝަރުވާން އަތުލާފައިވަނީ އެހެން މީހެއްގެ ނަމުގައި ފެޑެކްސް މެދުވެރިކޮށް ގެނެވުނު ފޮށިގަނޑަކާ ހަވާލުވާން ދިޔަ ވަގުތުއެވެ. މި ފޮށިގަނޑު ފްލައި ދުބާއީގެ ފްލައިޓެއްގައި ރާއްޖެ އެތެރެކުރެވުނު އިރު، ކަސްޓަމްސްގެ ސްކޭނިންގ އިން ޝައްކު ކުރެވޭ ކަންތައްތަކެއް ފާހަގަކުރެވުމާ ގުޅިގެން ފުލުހުންނާ ހަވާލުކުރެވުނެވެ.
ފުލުހުންގެ އޮޕަރޭޝަނުގައި، ފުރަތަމަ ފޮށިގަނޑާ ހަވާލުވާން އައި މުހައްމަދު ޝިޔާހު އަލީ މެދުވެރިކޮށް، މި ފޮށިގަނޑުގެ އަސްލު ވެރިފަރާތް ކަމަށްވާ ޝަރުވާން ހޯދުނެވެ. ޝަރުވާންގެ އަތުން ފެނުނު ފޮށިގަނޑުން 989.1 ގްރާމްގެ މަސްތުވާތަކެތި ހުރި ދެ ރަބަރު ޕެކެޓް ފުލުހުންނަށް ފެނުނެވެ.
ޝަރީއަތުގައި ޝަރުވާން މި ދައުވާއަށް އިންކާރުކޮށް، މަސްތުވާތަކެތި ހުރި ފޮށިގަނޑު ގެނައުމުގައި އެއްވެސް މޯޓިވްއެއް ނެތްކަމަށާއި އެކަމުގައި އަމަލީގޮތުން ބައިވެރިވެފައި ނުވާނެކަމަށް ބުނިނަމަވެސް، ކޯޓުން ވަނީ ކުށުގެ ހުރިހާ ރުކުނެއް ސާބިތުވާކަމަށް ކަނޑައަޅައި، 25 އަހަރުގެ ޖަލު ހުކުމެއް އިއްވާފައެވެ.
ހުކުމާއެކު، މި މައްސަލައިގައި ފައިސާގެ މުއާމަލާތެއް ހިންގިކަން ސާބިތުނުވާތީ އާއި ގިނަ އަދަދެއްގެ ފައިސާ ފެނިފައިނުވާތީ، ޖޫރިމަނާގެ ގޮތުގައި އެންމެ ކުޑަ އަދަދުކަމަށްވާ އެއްލައްކަ ރުފިޔާ ކަނޑައަޅާފައި ވެއެވެ. މިފަދަ މައްސަލަތަކުގައި ގާޒީންނަށް އުމުރު ދުވަހުގެ ޖަލު ހުކުމް ފިޔަވައި އެހެން އިޚްތިޔާރެއް ނެތްނަމަވެސް، އެއްލައްކަ ރުފިޔާއިން ފެށިގެން ދެ މިލިއަން ރުފިޔާއާ ހަމައަށް ޖޫރިމަނާ ކުރުމުގެ އިޚްތިޔާރު ލިބިދީފައިވެއެވެ.
