މަދީނާ އިންވެސްޓްމަންޓުން އަޅަމުންދާ ސްކޫލާއި މިސްކިތުގެ މަޝްރޫޢުއާ ފެށިތާ މިހާރު ތިން އަހަރަށްވުރެ ގިނަ ދުވަސްވެފައިވާއިރު، މި މަޝްރޫޢުއާ ގުޅޭގޮތުން ފަތުރަމުންދާ ބައެއް މައުލޫމާތުތަކަކީ ހަގީގަތާ ހިލާފު ވާހަކަތަކެއްކަމަށް މަދީނާ އިންވެސްޓްމަންޓްގެ ސީއީއޯ އަލީ އަހްސަން ވިދާޅުވެއްޖެއެވެ.
އަލީ އަހްސަން އިތުރަށް ހާމަކުރެއްވި ގޮތުގައި މި މަޝްރޫޢުގެ އެގްރީމެންޓްގައި ސޮއިކުރެވިފައިވަނީ ނިމިދިޔަ ސަރުކާރުގެ ދައުރުގައެވެ. އަދި މިއީ ހުރިހާ ގާނޫނީ އިޖުރާއާތުތަކެއް ފުރިހަމަކޮށްގެން ކުރީގެ ސަރުކާރުން އެވޯޑު ކުރި މަޝްރޫޢުއެއްކަމާއި، މި ބިމަކީ ކުލި ދައްކާ ގޮތަށް އޮތް ބިމެއްކަންވެސް އެމަނިކުފާނު ފާހަގަކުރެއްވިއެވެ.
މަދީނާ އިންވެސްޓްމަންޓްގެ ސީއީއޯ އިތުރަށް ވިދާޅުވިގޮތުގައި ސްކޫލުގެ ބިމުގެ ފްރޭމްވޯކް އެގްރީމެންޓްގައި ސޮއިކުރީ އެޗްޑީސީގެ ކުރީގެ މެނޭޖްމަންޓުންނެވެ. އަދި ސްކޫލުގެ ޑިޒައިން އެޕްރޫވްކޮށްފައިވަނީ ކުރީގެ އެޑިއުކޭޝަން މިނިސްޓްރީންނެވެ.
މި މަޝްރޫޢުގެ ދަށުން އިސްލާމީ ތައުލީމު އެންމެ ރަނގަޅު ގޮތުގައި ކިޔަވައިދެވޭނެ ސްކޫލެއް އެޅުމުގެ އިތުރުން، ހުޅުމާލެ ރެޑްވޭވް ސިޓީ ސްކޮއަރ ކައިރީގައި ހުންނަ ވަގުތީ މިސްކިތް ތަރައްގީކުރުމަށްވެސް ވަނީ ހަމަޖެހިފައެވެ. މި މިސްކިތަކީ 2000 މީހުންނަށް އެއްފަހަރާ ނަމާދުކުރެވޭ ގޮތަށް ލައިބްރަރީއަކާއެކު 2 ބުރިއަށް އަޅާ މިސްކިތެކެވެ.
މި މަޝްރޫޢުއާ ގުޅޭގޮތުން ދެކެވެމުންދާ ވާހަކަތަކާ ގުޅިގެން، މަދީނާ އިންވެސްޓްމަންޓްއިން ވަނީ މިއީ ގާނޫނީ ހުރިހާ އިޖުރާއާތުތަކެއް ފުރިހަމަކޮށްގެން ކުރިއަށްގެންދާ މަޝްރޫޢުއެއްކަމާއި، އެއްވެސް ކޮރަޕްޝަނެއް މީގައި ނުހިމެނޭކަން ކަށަވަރުކޮށްދީފައެވެ.
