މާލޭގައި ހުންނަ ބޮންޑެޑް ވެއާހައުސްއަކުން ގިނަ އަދަދެއްގެ ސިނގިރޭޓް ގެއްލުމާ ގުޅިގެން އެތަކެތީގެ ވެރިފަރާތް 40 މިލިއަން ރުފިޔާއަށް ވުރެ ގިނަ އަދަދަކުން ކަސްޓަމްސްއިން ޖޫރިމަނާކޮށްފިއެވެ. މި މައްސަލަ ވަނީ ފުލުހުންނަށްވެސް ހުށަހަޅާފައެވެ.
ކަސްޓަމްސްގެ ރެކޯޑުތަކުން ދައްކާގޮތުން، ގެއްލިފައިވަނީ 34،500 ކާޓޫނުގެ ސިނގިރޭޓެވެ. މި ތަކެތީގެ އިމްޕޯޓް ޑިއުޓީ އާއި ރެވެނިއު ސްޓޭމްޕްގެ ގޮތުގައި ދައުލަތަށް 47 މިލިއަން ރުފިޔާ ލިބެން އޮތެވެ.
ހޯމް މިނިސްޓަރު އަލީ އިހުސާން ވިދާޅުވިގޮތުގައި، މިހާތަނަށް ބޮންޑެޑް ވެއާހައުސްތައް ހިންގަމުން އައީ މާލޭގެ އެކި ގެތަކާއި އެޕާޓްމަންޓްތަކުގައެވެ. މި ތަންތަނުގައި ދެ ތަޅު ހަރުކުރެވިފައި ހުންނައިރު، އޭގެ ތެރެއިން އެއް ތަޅުދަނޑި އޮންނަނީ ކަސްޓަމްސްގެ ބެލުމުގެ ދަށުގައެވެ. ސިނގިރޭޓް ގެއްލުނު ވެއާހައުސްއަކީވެސް މިފަދަ ގެއެއްގައި ހަދާފައި ހުރި ތަނެކެވެ.
އިތުރަށް އިހުސާން ވިދާޅުވި ގޮތުގައި، ވެއާހައުސް ހިންގި ތަނުގައި އެހެން މަސައްކަތެއް ކުރަމުންދާކަމުގެ މަޢުލޫމާތު ކަސްޓަމްސްއަށް ލިބުމާ ގުޅިގެން، އެކަން ކަށަވަރުކުރުމަށްފަހު ވެއާހައުސްގައި ހުރި މުދަލަށް ޑިއުޓީ ދެއްކުމަށް ވަނީ އަންގާފައެވެ.
ސަލާމަތީ އަދި ކޮންޓްރޯލް ކުރުމުގެ ގޮތުން ގެތަކުގައި ބޮންޑެޑް ވެއާހައުސް ހިންގުމަކީ އެންމެ ރަނގަޅު ގޮތްކަމަށް ނުފެންނާތީ، މިހާރު ވަނީ އައު ސިޔާސަތެއް ތަންފީޒުކުރަން ފަށާފައެވެ. މީގެ ދަށުން ބޮންޑެޑް ވެއާހައުސްތައް ހިންގޭނީ ހަމައެކަނި ކަސްޓަމްސްގެ ފުރިހަމަ ކޮންޓްރޯލް އޮންނަ ސަރަހައްދުތަކުގައި އެކަނިކަމަށް ވަނީ ކަނޑައަޅާފައެވެ.
