ޓޫރިސްޓް ވިސާ އާ ހިލާފުވެގެން ދެ ބިދޭސީއަކު އިމިގްރޭޝަނުގެ ބެލުމުގެ ދަށަށް ވަނީ ގެންގޮސްފިއެވެ. މި ދެ ބިދޭސީންނަކީ ޓޫރިސްޓް ވިސާގައި ތިބެ ހުއްދަނެތި ވިޔަފާރީގެ ހަރަކާތްތަކެއް ހިންގުމާއި އެކު އާންމު ތަންތަނުގައި ގާނޫނާ ހިލާފަށް ދިރިއުޅެމުން ގޮސްފައިވާ ފަރާތްތަކެކެވެ. އިމިގްރޭޝަނުން މިހާރު މަސައްކަތް ކުރަމުންދަނީ މި ދެ ބިދޭސީން ރާއްޖެއިން ޑިޕޯޓްކުރުމުގެ މަސައްކަތް ނިންމުމަށެވެ.
ފާއިތުވި މަސްތަކުގައި އިމިގްރޭޝަނުން ހިންގި އޮޕަރޭޝަންތަކުގައި ވަނީ ގާނޫނާ ހިލާފަށް ރާއްޖޭގައި އުޅޭ ގިނަ އަދަދެއްގެ ބިދޭސީން ހައްޔަރުކޮށްފައެވެ. މީގެ ތެރޭގައި ހިމެނެނީ ވިސާގެ މުއްދަތު ހަމަވެފައިވާ މީހުންނާއި، ޓޫރިސްޓް ވިސާގައި ތިބެ މަސައްކަތްކުރާ މީހުންނާއި، ވަޒީފާ ދޫކޮށް ފިލައިގެން އުޅޭ ބިދޭސީންނެވެ. އިމިގްރޭޝަނުން ކުރިން ވެސް ވަނީ ވިސާ ޤަވައިދާ ހިލާފުވާ ފަރާތްތަކާމެދު ހަރުކަށި ފިޔަވަޅު އަޅާނެކަމަށް އިއުލާންކޮށްފައެވެ. މިހާތަނަށް އިމިގްރޭޝަންގެ އޮޕަރޭޝަންތަކުގައި ގިނަ އަދަދެއްގެ ބިދޭސީން ހިފަހައްޓައި، 5،000 އަށްވުރެ ގިނަ މީހުން ވަނީ ރާއްޖެއިން ޑީޕޯޓްކޮށްފައެވެ.
