އެމްޑީޕީގެ އިސް މެންބަރެއް އަދި ރައްޔިތުންގެ މަޖިލީހުގެ މަނަދޫ ދާއިރާގެ ކުރީގެ މެންބަރު މުހައްމަދު ތޯރިގު ވިދާޅުވެފައިވަނީ އޭނާގެ ނަމުގައި އޮޅުވާލައިގެން ޕީއެންސީއަށް ފޯމެއް ހުށަހަޅާފައިވާ ކަމަށެވެ. މި މައްސަލަ ބެލުމަށް އެދި ތޯރިގު ވަނީ ފުލުހުންނަށް ހުށަހަޅުއްވާފައެވެ.
ތޯރިގު މިއަދު ޕޮލިސް ކޮމިޝަނަރަށް ފޮނުވި ސިޓީއެއް ޓްވިޓަރުގައި ހިއްސާކުރައްވާފައިވެއެވެ. އެ ސިޓީގައިވާ ގޮތުން، ތޯރިގު މި މައްސަލަ އެންމެ ފުރަތަމަ ފުލުހަށް ހުށަހެޅުއްވީ މިދިޔަ އަހަރުގެ ޑިސެމްބަރު 26 ގައެވެ. އެ މައްސަލަ ހުށަހެޅުއްވީ އިލެކްޝަންސް ކޮމިޝަން (އީސީ)ން ހޯދި ޕީއެންސީ މެންބަރުކަމުގެ ފޯމާ އެކުގައެވެ.
ކަނޑައެޅިގެން އަޅުގަނޑުގެ ފޮޓޯ ނޫންކަން އެނގޭވަރު ތަފާތު އެހެން މީހެއްގެ ފޮޓޯ ޖަހާފައި، ކިރިޔާ ބަލާލިޔަސް އަޅުގަނޑުގެ ސޮއި ނޫންކަން އެނގޭވަރު ތަފާތު ސޮޔެއް ކޮށްފައި، އަޅުގަނޑުގެ މަންމަގެ މައުލޫމާތުވެސް ގޯސްކޮށް ލިޔެފައި، ކޮންމެވެސް މީހެއްގެ ފިންގަރ ޕްރިންޓު ޖަހާފައި އަޅުގަނޑުގެ… pic.twitter.com/YUfrn5ZRs8
— Mohamed Thoriq (@ManadhooThoriq) January 5, 2025
އެމްޑީޕީގެ ވެރިކަމުގައި ހެރިޓޭޖް މިނިސްޓްރީގެ ސްޓޭޓް މިނިސްޓަރުކަން ކުރެއްވި ތޯރިގު ސިޓީގައި ފާހަގަކުރައްވާފައިވަނީ އެ ފޯމުގައިވާ ފޮޓޯއާއި، ފިންގަރޕްރިންޓް އަދި ސޮޔަކީވެސް އޭނާގެ ނޫންކަމަށެވެ. އަދި ހެކީންގެ ގޮތުގައި ސޮއިކޮށްފައިވަނީވެސް އޭނާއަށް ނޭނގޭ ބައެއްކަން ފާހަގަކުރައްވާފައިވެއެވެ.
ތޯރިގު ފުލުހުންގައި އެދިވަޑައިގެންފައިވަނީ އެ ފޯމުގައި ޖަހާފައިވާ ފޮޓޯއަކީ ކޮން ފަރާތެއްގެ ފޮޓޯއެއްކަމާއި، ފޯމުގައި ސޮއިކޮށް ފިންގަރޕްރިންޓް ޖަހާފައިވާ ފަރާތްތަކުގެ އިތުރުން، ހެކީންގެ ގޮތުގައި ސޮއިކޮށް ފިންގަރޕްރިންޓް ޖަހާފައިވަނީ ފޯމުގައި ބުނާ މީހުންކަން ހޯދައިދިނުމަށެވެ.
